超經典動作遊戲《鬼武者》終於有 Remaster啦（呢碗冷飯炒得靚）。琴晚 Capcom 宣布，將推出係 2001 年於 PlayStation 2 發售既知名動作遊戲《鬼武者》Remaster 版本《Onimusha：Warlords》，而且仲會有 PS4 / Xbox One / Nintendo Switch 以及 PC 版本。

如果有返咁上下機齡既，相信都會認識呢隻遊戲。《鬼武者》係由知名製作人稻船敬二製作，屬高難度動作遊戲。最特別之處係主角明智左馬介個樣就係用真人影星金城武黎設定，係當時係好轟動，亦都令到大家對該系列之後作品起用邊位影星充滿期待。

今次《鬼武者》Remaster 屬高畫質版移植，將支援寬螢幕解析度，玩家可選擇 16:9 或 4:3 比例顯示。另外除左可以用原版操作，仲會對應類比搖桿，亦都加入簡單模式，方便動作遊戲苦手。

《Onimusha：Warlords》將於 2019 年於歐美上市，對應平台為 PS4 / Xbox One / Nintendo Switch / PC 售價 19.99 美元。