喺網路未係咁發達嘅年代，大家打機，又有無一路玩一路寫筆記嘅習慣？

我講先，利申我有，我第一隻玩嘅華語 RPG 係昱泉國際嘅《笑傲江湖之日月神教》，當時我仲讀緊小學，遊戲中嘅部份解謎對我黎講，真係 OK 難，最後一個謎宮要記陰陽五行（定唔知咩），所以當時我係拎一本漫畫月刊送嘅周邊筆記簿一路寫一路玩爆機的！

個 Game 而家睇返真係好 Old School LOL：

日本網友 ＠ishikoro18 早前就喺 Twitter 上面分享左件趣事，佢本身都係一個熱愛打機嘅玩家，但係無諗過佢爸爸後生時都係，仲要係一個非常熱心同埋認真嘅玩家添！事緣係佢喺屋企搵到老竇當年打機留低嘅手寫攻略本……

網友唔單止同我一樣，對老竇居然有咁好心機、又字又圖表又彩色咁樣表示驚嘆，佢仲笑言「老竇當年打機啲口味都幾 Dark」咁話！不過呢位爸爸其實年紀唔算好大，《Final Fantasy X》《Silent Hill 2》《零-zero-》呢啲遊戲我後來都有機會玩得返（定其實我已經叫年紀大……orz），所以我見到呢個 Tweet 真係份外有親切感！

要知道當年嘅 RPG 或者冒險遊戲嘅解謎成份，大多比而家嘅新作品要黎得難度高，所以，我明呀網友爸爸，我絕對明點解你要寫呢堆攻略，我亦都好明白點解你結左婚搬埋屋都要拎埋呢啲筆記跟身（笑）

各位朋友又有無試過搵到父母以前毒毒嘅痕跡呢？