不論外國定香港都好多玩家期待緊《Anthem》呢隻大作，但係由於 EA 既關係，大家心入面都仲係有啲陰霾。慶幸既係遊戲製作人 Mark Darrah 同監製 Jonathan Warner 佢地連日係 Twitter 上為大家解答一眾玩家既問題，當中含有大量遊戲既新情報，最重要既係今次 EA 竟然大發善心唔洗錢都有得 in game 買 Skin，咁就真係值得讚啦！

首先就係前面講到既 Skin，Jonathan Warner 就話係遊戲發售初期唔會有武器 Skin，而機甲既 Skin 係遊戲內將透過完成部份任務獲得，而且呢啲裝飾性物品係唔會對能力上有任何影響，純觀賞 Only，大家唔洗課金就可以得到。

另外《Anthem》入面既重點裝甲「Javelin」亦有提到一啲情報，係任何情況下都容許玩家任意配置裝甲類型，並無強制要求玩家使用晒四種裝甲先可以出機既機制。而機甲除咗 Skin 之外，Parts 亦都可以自定，而呢個就會影響機甲性能啦，不過有啲選項就要解鎖後先可以使用。同時佢仲有提到係四種裝甲入面，「Storm」係唯一會有斗篷既裝甲，仲有短距離傳送能力。

雖然好多聲音話《Anthem》同《Destiny》好相似，但係以下二點就絕對比起後者優勝。係《Anthem》內，大家既背包係唔會有容量限制，玩家可以保留所有戰利品，最重要既係部份裝備係可以同其他玩家共享，簡直係玩家福音！另外 Jonathan Warner 亦有係其他平台提及過「玩家只有係多人遊玩先會體驗及真正了解到《Anthem》，呢點係有別於以往 BioWare 既遊戲，畢竟眾所周知呢間加拿大廠商最擅長既係單人故事內容。」，所以大家搵定隊友啱架啦。

如果大家有睇之前啲影片，應該有留意到雖然有大量空戰場面，但係好多野仲係無展示到的，二位亦有解答呢方面既問題。首先係飛行中如果發生碰撞會唔會構成攻擊傷害，答案係否的。但係開發組係空戰入面其實有加入格鬥攻擊，大家可以玩返場 Gundam Fight啦！至於 PVP 方面，官方係好早既時候就講過遊戲初期係唔會有的，不過係 Twitter 上亦有補充唔會排除之後加入既可能性。而 BioWare 亦會係將來為遊戲開發一個手機 APP，相信會好似《Destiny》個 APP 咁既用途。

最後亦都係最重要既消息就係，大家好快會收到《Anthem》Demo 既相關消息，不過係 Demo 既進度就唔會保存到正式遊戲。《Anthem》將於明年 2 月 22 日正式發售。PC 平台既 Origin Access會員及 Xbox 平台既 EAX 會員可以享有提前七日體驗 10 小時遊戲內容，而 Origin Access 高級會員則可以提前七日體驗遊戲既全部內容，至於 PlayStaion 用戶又點呢，佢咁答囉……