我一向幾鍾意玩開放世界嘅 RPG 遊戲，因為作為故事主角，其實我要去邊、我要做咩，都好應該由我話事吖，係咪先！（笑）今次介紹呢隻由法國獨立遊戲工作室 Midgar Studio 開發嘅《Edge Of Eternity》絕對係我黎緊密切留意嘅作品，遊戲打正旗號係喺《Final Fantasy》系列中收集靈感，從而再由工作室編寫全新嘅故事，所以驟眼睇的確幾有 FF 嘅味道。
遊戲充滿科幻感，故事發生於一片名為 Heryon 嘅大陸，大陸上面三個國家 Astrya、Junor 及 Dehostra，一直以來平均利用水晶之力維持各自發展與和平。然而，有一日，大陸上面出現左來自異界嘅侵略者，雖然三個國家合力將其擊退，但係侵略者留低左名為「金屬病」嘅傳染病，會令到生命體變成「半生物、半機械」嘅怪物。
玩家飾演嘅角色 Daryon ，係 Astrya 嘅國家精鋭部隊成員，為左搵出解決方法，你踏上了旅程。
遊戲於世界觀同戰鬥系統上面都吸收左好多《最終幻想》系列嘅特色（特別係 FF13&15），係一種融合指令輸入與即時戰鬥嘅模式，同時亦有 ATB 選項。攻擊模式有物攻、魔攻，角色、武器及技能則分別需要升級，而配合劇情中得到「水晶」嘅力量，仲可以將某啲隱藏技能解鎖添。
雖然係法國人整嘅遊戲，不過當中卻有好濃 JRPG 元素，既然講到明係開放世界，玩家去邊都基本上不受限制，唔同地域有各自嘅支線比你接，當然亦都有特別難打嘅 Boss 級怪比你挑戰，地圖上亦會有天氣同埋日夜嘅變化；比較特別嘅係，玩家於遊戲中部份選項係會影響劇情發展的，以一個細廠出品遊戲黎講絕對係非常有心思！
遊戲另一個賣點係 BGM，負責遊戲音樂擔當嘅其中一位作曲家，係光田康典先生，佢曾經負責過嘅遊戲包括有《超時空之鑰（Chrono Trigger）》及《Xenogears》系列，雖然未知道光田先生負責幾多比例嘅音樂，不過，遊戲 Trailer 使用嘅主題曲「BATTLE OF ENERNITY」就係佢嘅作品。
遊戲早於 2015 年 2 月已於 Kickstarter 上面集資，成功獲得 16 萬美元支持，今年 11 月 29 日將率先於 Steam 上面推出；不過工作室野心不止於至，黎緊仲打算將遊戲登錄 PS4 及 XBox 平台，如果有咁嘅一日，唔知你又會唔會有興趣玩呢？
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。