又黎到鬼節呢啲時間，梗係要玩下恐怖 Game 應下節啦（誤）！最近就有一隻標榜住真人真事既遊戲《Uventa》選擇係呢個時間上市，睇片同介紹就幾吸引下，係呢個檔期推出似乎有一試既價值！
《Uventa》由獨立團隊 Black Rat 製作，採用 Unreal Engine 4，屬於第一身恐怖解謎遊戲。遊戲描述前蘇聯時代，一間學校中發生既詭異事件，並且標榜係真實事件改編。玩家係遊戲內係扮演一位夜班保安，係呢個廢棄既校園內探索埋藏於黑暗中既祕密。
而本作有個地方幾特別，佢並唔會有其他恐怖遊戲常見既「嚇你一跳」式，突如其來既野黎嚇你，反而係透過黑暗既光影變換、空間氛圍、壓逼感等要素逐步令你窒息。當然遊戲除咗恐怖之外，佢地對解謎呢 Part 都充滿信心，並且強調玩家克服種種難關後，會有意想不到既結局等緊你。
《Uventa》預計於 8 月 23 日推出，對應平台為 PC Steam，語言就只有英文及俄文。
動漫電玩宅，極愛金田一系列，擅長動作及策略遊戲