適逢農曆七月，今日同大家介紹隻恐怖遊戲先……嗱如果你地下下都拎《P.T.》黎比咁好唔公平架，反正而家都無得玩啦係咪？（喂）不如又睇下呢隻《Lunacy: Saint Rhodes》啱唔啱你口味。
遊戲由獨立遊戲工作室 Lazarus Studio 開發，玩家飾演嘅主角，係一位超自然學家（即係專研究啲非自然現象、靈異事件等嘅職業），佢父母於童年時遭人殘殺，然而死因一直不明。佢喺做哂心理準備之後，發現家族祖屋居然會有線索，於是佢就隻身去到位於聖羅德島上嘅大宅，希望靠而家自己嘅知識，去搵出當年父母慘死嘅真相。
咁講得係恐怖遊戲，當然就唔係金田一搵真兇咁查案，因為主角甫回到大屋，先發現屋裡殘留嘅，係大量疑似不明宗教儀式嘅物事，仲搵到一本記載住不明符號嘅手寫扎記，裡面仲畫左一啲惡魔模樣嘅生物。
遊戲目前並無對劇情透露太多，不過，對於主角父母之死，以及以上呢堆邪教儀式，官方就用左「Dark Family History」呢個字眼黎形容！就咁睇個故事大綱都知道謎團重重。
遊戲採用第一人身視點操控，以探索解謎為主，目前未見任何攻擊動作方面嘅設定。遊戲特別嘅地方在於，遊戲中被稱為「The Author」嘅 AI 系統角色，會一路了解同學習玩家於遊戲中行走、動作嘅狀態，隨而作出唔同嘅行動，所以玩家呢一路上嘅探索並不孤單，因為 Big brother is watching you /w\
奇怪的祭壇
遊戲預計 2019 年在 Steam 上推出，對應英文及簡體中文，暫時未有家用機化的消息！有興趣嘅玩家可以睇埋以下 Trailer：
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。