星期一，相信大家嘅心情都同我一樣，喺起身嗰一刻就已經眼神死，個心飄過一句「咁又星期一，又要返工」。但係，無論你幾眼瞓都好，工作一日未做完，作為一個有責任感嘅人，你都唔駛旨意瞓！
獨立遊戲工作室 Spotlightor Interactive 就係想話比大家知，打工仔反抗睡魔嘅心路歷程有幾咁可歌可泣，所以研發左《Yet Another Exhausting Day》呢個小品遊戲。遊戲中嘅男主角，係一個好鍾意睇村上春樹小說嘅社畜打工仔，佢每日都會努力工作直至體力透支，為左唔好令自己瞓著，喺遊戲中佢都可以話係無所不用其極……
遊戲玩法好簡單，玩家可以操控主角行動嘅方向，喺唔同嘅空間入面，避開哂所有會令你瞓著覺嘅障礙，並將男主角送到目的地繼續做野！主角行動分為「行走」以及「地下碌碌下」兩種，不過，因為攰嘅關係，主角嘅移動方式好笨拙，所以要順利通關都需要技巧架！因為空間入面會出現唔少枕頭，主角個頭一觸碰到枕頭就會即刻瞓著……無錯，即係同時意味住你 Game Over，要重新遊玩剛關卡了～
不過，遊戲都唔只淨係避開枕頭咁簡單，畫面上方嘅「Sense」欄，同時係倒數緊主角距離緊睡魔來襲仲有幾耐！為左令佢保持清醒，古有懸樑刺股，而家有頭爆花樽，頭撞牆，頭撞乜都得，反正苦肉計就一定得，唔駛理主角死活架，唔好令佢瞓著，你就贏架啦 LOL
不過，係咁撞主角個頭都唔係無回報的，比你撞爛嘅傢俱有可能幫你順便破壞埋啲枕頭，仲有機會得到咖啡因提提神飲料，簡直係居家必備嘅良藥吖！
遊戲目前仲係開發階段，正式推出日未知，不過有興趣嘅朋友可以下載佢嘅 Demo 試玩版過下癮先；官方話目標係想將遊戲登錄哂 PC 同埋 PS4 等嘅家用機平台，所以我地就一齊期待下啦！
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。