Switch 上面經常有唔少有趣嘅小品遊戲，今次介紹呢隻《The Escapists 2》由英國遊戲工作室 Team17 Digital Ltd 開發，第一集《The Escapists》於 2015 年推出後大獲好評，所以今次工作室再接再厲推出改良玩法嘅第二代！遊戲於 2017 年 8 月已經率先於 Steam 上推出，而今年 8 月 9 日更會將作品移植埋落 Switch 平台。

遊戲故事好簡單，你，坐緊監，而你身處嘅監獄，係全世界守衛最森嚴嘅獄所；玩家嘅目標，就係要逃獄離開呢個地方。

題目講嘅掘廁所，只係方法嘅一種，你可以練大隻，揀同全部獄卒直接駁火、亦可以玩心計，收買獄卒，拎佢制服，大模斯樣行出去、亦都可以進行最老套傳統嘅方法，就係整爛廁所掘條地道出去。要選擇邊種方法，全由玩家自己決定，總之走到就得！

正面衝突駁火

同其他人合作整道具 eg. 炸彈（唔好問我點解森嚴嘅監獄會有材料比到你整炸彈）

馬桶 Play /w\

唔理你用邊種方法，首要條件係時機成熟之前，唔可以引起獄卒嘅懷疑；所以，日常安排比你嘅時間表同埋工作都要做得好，包括準時起身晨操、食飯、工作等等，簡單黎講， 日頭你就要做個乖乖模範生，大佬叫你做乜就做乜……當然有時間可以比你收集道具，或者同其他人傾逃獄大計，就好睇你識唔識把握時機啦。

今次嘅第二集終於支援 Online Co-op，最多支持四人聯機，以及二人 Local Play，正所謂兄弟齊心，其利斷金，咁馬桶入面都係金吖，因為想順利離開監獄，有其他人嘅幫助都好緊要，四個人可以一齊打出去，亦可以分頭收集情報或者同其他獄中人士做朋友，喺佢地手中仲可以獲得唔同嘅材料，比你地製造或改裝成其他道具，例如係武器或者鐵鏟等等。

入手 Switch 版遊戲嘅朋友可以考慮買埋 DLC「栄光の帝国」，DLC 入面嘅監獄，係一個上上下下都比人洗左腦嘅地方，玩家記得每日去拜四次「栄光像」以示忠貞……呢個設定真係好鬼痴線 LOL

Steam 版同時支援英、日、簡體中文，Switch 版就得英日文，不過遊戲入面需要消化嘅劇情唔多，就算無中文都唔怕玩唔到的。

最後送上遊戲 Trailer：

【Switch 版日本 e-shop 傳送門】
【Steam 版傳送門】