唔知大家對於「超自然現象」呢個題材有無興趣，無論係神神怪怪，抑或係都市傳說，咁多年黎都有唔少人士非常熱衷於呢啲神祕嘅事物。

今次介紹呢隻《恐怖の世界（恐怖的世界 World Of Horror）》由獨立遊戲工作室 Ysbryd Games 開發，工作室創辦人係一位波蘭人，佢一直好鍾意日本文化，特別係伊藤潤二嘅作品；同時，佢亦都好喜歡克蘇魯神話（《Bloodborne》都係用呢種神話做背景），所以，佢一直好想做出一隻融合呢兩個元素嘅遊戲。

遊戲背景為 1980 年代嘅日本，玩家身處嘅地方臨近海邊，你發現海邊出現左奇異嘅怪物，亦察覺到「邪神」似乎即將覺醒，但係，你身邊嘅人卻全部都無發現世界正走向滅亡，無錯，係一個非常中二設定嘅故事。為左拯救世界，玩家惟有自己一人獨力嘗試去搵出生活裡面眾多謎題嘅真相。遊戲玩法，就係玩家要喺日常中拆解所有「超自然現象」。

從截圖中大家都見到遊戲畫面非常質樸，咁係因為工作室想呈現 80 年代 Mac 機嘅畫面，令玩家更能切入時代。遊戲使用自由場景模式，玩家可以自由探索地圖上唔同地方，按你喜好順序解開各個地方嘅謎團。

探索時玩家可能會獲得道具，但如果遇上奇怪事件就會影響你嘅「厄運值（Doom）」，同時仲好可能會遇上啲克魯蘇怪物呀、伊藤系恐怖情節咁樣。假設玩家失去理智或者死左，遊戲就會由該章節重新黎過，設定上都算 Friendly（笑）

呢個遊戲舊年同埋今年都有參展日本遊戲展（TGS），預計 2019 年正式推出，雖然大家見到嘅畫面都係英文為主主，不過工作室亦都計劃將遊戲開發成其他語系，日文版亦會先行推出。對應平台為 PS4、Switch 及Steam（Windows、Mac、Linux），售價未知，但係絕對會係我來年必玩遊戲之一！