曾經被 IGN 評為滿分作品既獨立遊戲《Undertale》，當中各種搞笑既對白、對傳統 RPG 既嘲諷，創新戰鬥系統等等元素都獲得一致好評。而呢隻滿分評價神作繼移植 PS4 及 PSV 之後，正式宣布將會登錄 Nintendo Switch ，真係非常值得高興！

《Undertale》由 Toby Fox 獨立開發，遊戲講述一位人類小孩跌入充滿住怪獸既地底世界，而呢個世界同地上既世界係有強大既魔法屏障隔離，所以玩家表面上既任務就係返去地面世界，而呢個過程充滿住搞笑、溫情，又或者係冷血、殺戮，全部取決於你既選擇。

本作擁有眾多特色系統，當中既戰鬥系統有別於一般 RPG，玩家必須閃躲對手彈幕攻擊，並且可以選擇寬恕又或者擊殺佢地，而呢啲選舉係會影響遊戲既發展、音樂、對話、人物、故事及結局。另外《Undertale》入面出現大量傳統 RPG 梗，大家係玩果陣會發現不論係《DQ》又或者《FF》系列元素都會係遊戲內搵得到 （其實呢隻遊戲靈感黎自於Mother系列）。

最有趣既係《Undertale》中隨時都可以重置遊戲進度，但係重置遊戲進度並唔係真係將所有野完全重置，係遊戲內部份角色會記得之前主角既所作所為，係對話中會偶爾提及、嘲諷、甚至會影響劇情發展，非常特別。

《Undertale》Nintendo Switch 版本將於 9 月 15 日正式發售，遊戲標準版售價格為 4,000日元，典藏版售價 8,800日元，電子下載版售價 1,500日元。