近年好似掀起番一股復古 RPG 熱潮，唔少作品都玩返以前 bit bit 2D 風格，當中最為人所知，當數近期大熱遊戲《OCTOPATH TRAVEL 八方旅人》。今次我為大家介紹呢隻《CHASM》，由美國獨立遊戲工作室「Bit Kid」開發，遊戲於 2013 年時於 Kickstarter 集資成功，耗時六年後，遊戲已於今年 7 月 31 日正式上架發售，登錄平台為 Steam、PS4 及 PSV。

玩家飾演嘅男主角，效力於 Guildean Kingdom 嘅前線兵營（你當係御林軍啦 LOL），夢想係成為出色嘅騎士。某日，你收到上頭 Order，前往名為 Karthas 嘅小城鎮，喺呢個城鎮裡面，有好多礦山，而礦山入面有大量王國需要嘅資源。玩家嘅任務，就係前往礦山，搵出礦山突然魔物湧現嘅原因！

雖然唔知點解王國咁大，偏偏淨係派你一個人去清怪，雖然聽落好似職場欺凌，不過老細話主角搞得掂個任務就可以升做騎士咁話，所以……故事就咁開始。

《CHASM》係一隻有 Metroidvania 元素嘅 2D 動作遊戲，玩法同埋動作模式深受《惡魔城X 月下夜想曲》以及《洛克人》影響，淨係魔物種類都有 80 種以上，佢地會以既定頻率喺地城中徘徊，玩家可以使用唔同武器，配合跳躍、蹲下 Dash、迴避等動作去打敗敵人。

玩家於遊戲中可以使用嘅武器種類超過 130 種，有近身亦有遠程武器，仲有會消耗 MP 嘅魔法道具添！地城中有 Save Point 可供玩家回復體力，而你升級或者食藥都可以補 HP，呢啲都係常見嘅 RPG 設定。

遊戲除左淨係打怪之外，亦鼓勵玩家多作探索，而唔好一黎就往 Boss 直衝；因為有時地城入面會搵返一啲失蹤嘅 Karthas 居民，救返佢地出去嘅話，可以解鎖城鎮裡面店舖或者強化功能架！隨住你救得人越多，搵到越多資源，呢個原本荒蕪嘅小鎮亦可以再次繁榮起來～

遊戲中一共有 6 個地城，隨住劇情推進而難度增加。地城中仲會有唔少要玩家用腦嘅解謎元素，有啲關卡仲會幫玩家解鎖技能，例如游水、高空滑翔等等，所以遊戲嘅可玩性其實十分之高！如果淨係衝主線嘅話，大約為 15 小時遊玩時間，但如果要所有支線清哂嘅話，大家就加油啦（笑）

遊戲目前已經上架，如果於 8 月7 日前購買會有 9 折優惠！最後為大家送上遊戲 Trailer：

【Steam 版傳送門】
【美版 PS Store 傳送門】