剛剛過去嘅動漫節，我地訪問咗《CODE VEIN》嘅製作人飯塚啟太先生。《CODE VEIN》係由《GOD EATER》團隊開發嘅新作品，遊戲大綱可以參考我地之前嘅【報導】。

遊戲嘅定位為「戲劇性探索動作 RPG」，呢個係遊戲開發初期已經決定左嘅方針。不過，飯塚先生表示，遊戲開發最大嘅挑戰就係「如何在劇本和動作兩者之間做到最好平衡」，始終作為一個動作遊戲，戰鬥動作必須夠爽快先可以滿足玩家。

至於點解挑選「吸血鬼」作為遊戲題材，飯塚先生笑言「唔係我地特別鍾意吸血鬼」，只不過，團隊認為喺攻擊過程可以同時吸收敵人力量嘅呢個設定好吸引，所以先會從而挑選「吸血鬼」作為角色人設。飯塚先生更加強調，遊戲中嘅「吸血牙裝」真係好型，希望玩家會鍾意咁話。

雖然遊戲支援三人同時遊玩（其中一人為 NPC 角色），不過，飯塚先生就話玩家當然係可以按照喜好選擇要唔要同朋友聯機，遊戲並無話玩家一個人玩或者兩個人玩就會有所影響，玩家可以按自己能力挑戰。NPC 人數（即故事當中可以一齊行動嘅伙伴）亦都已經公佈哂，目前未有打算再新添可使用角色。

至於遊戲當中會唔會有劇情選項發歧影響角色關係或者加入戰鬥隊伍，飯塚先生就先賣個關子了。

遊戲難度方面，飯塚先生亦坦言呢個係一個非常講究玩家實力嘅遊戲，如果有啲地方或者頭目真係唔夠打，玩家就惟有乖乖地升級先再去挑戰啦。

遊戲故事方面，就算玩家二周目都唔會出現新嘅劇情，不過敵人嘅強度會提昇，好處係玩家一周目時嘅等級同埋裝備繼續挑戰。遊戲之所以由今年 9 月份延期至 2019 年推出，係因為團體想喺動作系統方面做到最好，咁先叼以帶比玩家最一流嘅遊戲體驗。

至於被問到《CODE VEIN》同《DARK SOULS》系列嘅分別，飯塚先生強調呢兩個係喺系統以及世界觀上面都係完全唔同嘅遊戲，例如 NPC 有明確個人性格以，而且非常聰明，呢啲設定相信都係《CODE VEIN》獨立嘅特色。

編按：雖然遊戲目前延期左，不過作為玩家，我地都係想玩到最好嘅遊戲，所以我地對《CODE VEIN》目前仲係抱住期待！不過遊戲難度方面，玩慣《DARK SOULS》嘅朋友相信會覺得偏向簡單，到底正式推出時遊戲仲會有咩改動，我地會再為大家報導。