係今年既香港動漫節 Playstation 除咗有《生化危機 2》重製版試玩之外，仲邀請到遊戲製作人神田剛先生同我地香港媒體做咗次訪問，一隻既經典又好玩，仲係唔少 Fans 心目中想重製既 Biohazard，遊戲未推出之前大家都一定都想了解多啲今次有乜改動，立即睇下神田剛先生講咩啦！
一開始已被問及《生化危機 2》重製版會唔會有多人模式，神田剛先生就表示希望大家將焦點放返係單人模式度，所以暫時就唔會有多人模式。當然後續會唔會追加更新多人模式呢點，由於現階段仲未可以透露，所以希望大家密切留意。
而呢隻咁經典遊戲，但係重製時就採用全新表現手法，咁製作團隊會唔會感受到壓力呢？
神田剛先生就話要重製一隻咁經典既作品當然會有一定既壓力，但係其實團隊本身都係 Fans 黎，所以最困難既地方反而係點樣要係呢個集體回憶入面，揀邊啲場面及點樣重新演繹故事。另外亦都提到遊戲發售日對團隊係有一層重要既意義，所以將會全力達成係發售日如期推出。製作人咁有信心，相信都唔會 Delay 架啦！
作為 Fans 我地最想知道既問題就係當年極新穎既 Disk 1 Disk 2 系統（例如 Disk 1 Leon 可以留底唔執子彈比 Disk 2 Clare 咁，當然可探索地方亦有不同），係重製版到底會點樣重現，而當中又會唔會加入新劇情呢？神田剛先生就話今次並無沿用舊系統，而係一開始已經可以選擇 Leon Line 或者 Clare Line，當你完成二條 Line 之後就會體驗到完整既遊戲。
當然有留意相關報導都知道豆腐及第四生還者模式係會重現，我地亦有報導過，就唔再複述啦（在場當然有人問啦）。而神田剛先生亦都補充返，係警局內會有新地區可以探索，亦會新增其他地圖、NPC新劇情等等，務求令大家有新既體驗。
遊戲正式公開 Trailer 之後，被人垢病得最多既，就係 Leon 同 Clare 個樣點解同以前差咁遠。神田剛回應今次遊戲採用咗新既 RE Engine 黎開發（Bio 7 就係用呢個引擎），呈現出黎既影像會比較真實，所以原有角色都會以較真實既情況重現，咁先會顯得自然。製作團隊會保留角色原本既元素，然後將角色加入真實化既元素，最後就調整到大家見到既呢個樣貌，團隊亦都認為現時既樣貌係最適合重製版既設定。
當然一啲舊有唔合理既設定亦都有作出改變，例如 Leon 舊制服比較硬，似盔甲多過警察制服；Clare 當初係著住短褲仔騎電單車，係現實設定似乎唔係幾適合，所以重新設計成而家既樣。另一樣值得留意既就係 Ada Wong 及 Sherry 呢二位同主角關係極密切既角色，將會有新既登場要素，大家敬請期待！
《生化危機 2》重製版大家熱愛既求生刀將會設定為有損耗值，耗盡之後求生刀將會損壞，呢個設定亦都係為咗符合返「真實」既感覺。試想像如果你插咗把刀落隻喪屍度，掹返出黎時點都會有損耗，重複使用當然會爛啦，咁先夠像真架嘛！咁當然啦，係遊戲內唔會只有一把求生刀，所以放心劈喪屍啦。
之前既《生化危機 7》有推出過唔同血腥度既版本（香港版係最血腥，仲勁過 Z Rating），咁《生化危機 2》又會唔會有分唔同版本呢？神田剛就指因為每個國家對呢類血腥暴力內容規範都唔同，所以佢地會盡力係該地區既規範下做到最血腥恐怖，而日本版就仲調整緊。
如果有玩試玩版的話，一般喪屍大約要 7-8發子彈先打得死，雖然仲未能透露完成版血量係咪都係一樣，但係完成版同以前一樣都係有得選擇難易度的（唔知有無綠色 Beginner Mode 呢）。至於會唔會有舊版既無限彈等特別元素，暫時就未能透露，不過玩家如果係好希望重現呢種元素，團隊地亦會努力重現。
當中亦有提到《生化危機 2》重製版既唔係用固定鏡頭，亦唔係最新一集《生化危機 7》既第一身視點，反而係採用第四、五、六代既第三身視點，其實係因為團隊認為用第三身可以同時見到主角以及喪屍，對於營造恐怖氣氛較好。而且係探索解謎部份亦都方便玩家發掘，所以先會有咁既決定。
同神田剛先生訪問內容就係咁多，因為時間有限所以並唔能夠問得更深入，不過都叫了解多咗。《生化危機 2》重製版將於 2019 年 1 月 25 日發售，對應平台為 PS4 / Xbox One / PC。