今年香港動漫節邀請到《Jump Force》副製作人平田玲先以及著名聲優森田成一，而且仲為大家帶黎全球首播既影片。除此之外，平田玲先生仲同香港既媒體做咗個訪問，到底遊戲既選角用咩做考量，遊戲總數又會有幾多角色呢？以下一一為你解答！

Q：《Jump Force》角色取材採用什麼標準及有什麼考量？

A：首先要考慮既就係漫畫角色黎到現實世界打交會點樣，其次就係要考慮角色既受歡迎程度以及戰鬥既過程會唔會有趣。當然現階段仲有好多角色未能公布，所以希望大家多多期待。

Q：遊戲總數會有幾多位角色？

A：由於仲未可以公布有幾多角色，所以呢個問題仲未可以回答。不過可以肯定既就係，一定係會令 Fans 滿意既數目。

Q：係《Jump Force》PV 入面可以見到《死亡筆記》入面既角色夜神月及死神流克，佢地會係戰鬥角色？如果唔係的話，佢係遊戲內又會有咩作用？

A：首先《死亡筆記》既角色實力太強，寫「孫悟空」三個字對方就玩完。（笑）

係漫畫入面不論夜神月又或者死神流克，都唔係堂堂正正同人對決既角色，但現階段仲未可以透露相關資訊，所以大家敬請期待啦！

Q：製作香港場地時，會參考香港邊啲建築物呢？

A：其實我地製作香港時，並唔會話見到某個建築物就放落去，而係參考整體既風格再設計。例如香港既霓紅燈招牌，我地會將個風格融入而並唔係成個建築放入去。

Q：遊戲會有故事模式嗎？

A：遊戲內會有線上對戰模式，亦有一個個人模式，但未有透露會否有故事模式。

Q：點解會選擇香港為其中一個場地？

A：其中最重要既元素就係 Jump 係邊個地方受歡迎，其次香港亦係一個好特別既地方，既有新既地方，亦有舊既街景，仲被海所包圍，有眾多元素係呢個城市，所以我地決定為香港製作場地。另外遊戲入面會區域移動，例如本身於舊區戰鬥，於戰鬥途中會轉移到較現代既場景，呢個亦係本作既賣點之一。

Q：《Jump Force》會有戰鬥型角色以外既角色登場嗎？例如搞笑類型又或者運動類型？

A：首先《Jump Force》係一隻格鬥遊戲，而且入面既角色都係超人類或者係非人類角色，所以如果話係純運動型角色會比較難符合「超人類戰鬥」呢個設定。（即係網王有機會！？）

Q：今次公布黑崎一護呢個角色，而且巧合地《死神》同其他作品係一共三名角色登場，到底之後公布既作品係咪都會三人一組形式參戰呢？

A：雖然今次《死神》參戰角色同樣地係三人，但係其實並無呢種方程式的，希望大家繼續留意。

《Jump Force》將於 2019 年上市，對應平台為 PS4 / Xbox One / PC。