【遊戲評測】隱藏另類特殊玩法模擬遊戲《侏儸紀世界：進化》

不論係咩年代，模擬遊戲總有一班捧場客，係呢年我諗最多人玩既模擬遊戲應該就係《Cities: Skylines》，成日都見到唔少市長話邊度邊度塞車咁。不過亦有唔少人見到繁複既建造 Menu 已經唔想玩了，如果想過下癮玩下建造模擬遊戲、又想換下口味玩下特別啲既題材，推薦你要試下呢隻《侏儸紀世界：進化》。

遊戲基本上係叫你做侏儸紀公園既主人，要個島 Run 到最主要就係要去令個島多遊客、有錢賺；亦即係除咗要有大量恐龍之外，仲要有一應俱全既遊樂設施。除咗提供玩樂之外，當然要保障遊客既安全，咁到底隻遊戲係各方面表現如何呢？

畫面表現優勢細節一絲不苟

本身諗住隻 Game 畫面正正常常我都收貨（話晒賣點係玩恐龍嘛），點知畫面係出乎意料地好，一搬建築物貼圖紮實；尤其係落雨果陣無論地上、列車上等地方都會見到有水窪，以模擬遊戲黎講的確做得幾好。

至於主角恐龍質感做得非常好，一般黎講恐龍貼圖材質做得唔好就會有陣「膠」味，係《侏儸紀世界：進化》內完全無呢個問題，絕對抵讚（不過動作就略嫌單調，睇恐龍打交果陣就會 Feel 到）！而入園既遊客亦都唔係求其搵個人比你咁簡單，佢地會有自己既動作、互動，例如遊客係一家大細的話，會有時成家企定定玩 Selfie，都幾過癮！

恐龍材質貼圖效果唔錯

不過建築模式都幾煩，成日都因為地形限制令你起唔到野，有待改善

故事性及劇情接近零電影Fans可能略為失望

以一隻電影改編遊戲黎講，《侏儸紀世界：進化》同電影故事既關連可謂少得可憐，除咗幾位見慣見熟既角色會偶然有對話框出黎講二句之外，基本上都可以將呢隻遊戲視之為純模擬經營遊戲。無得好似電影咁訓練啲速龍，如果想係遊戲內重溫電影劇情的話，我會叫你玩 Lego 果隻《侏儸紀世界》好過。

電影角色係遊戲內只會以圖中呢種對話框形式出現

發掘恐龍化石孵化經改良恐龍

遊戲流程主要係搵錢 > 發掘部隊採集化石 > 分析研究化石 > 孵化恐龍，當中可以透過研究中心，研發更多改良方法去提升恐龍存活率及評價。恐龍主要分為草食及肉食類恐龍，開頭我都以為草食龍同肉食龍要分開養，但係原來可以混養的，只要滿足特定條件就可以共同生存。

研究後就可以對恐龍作出改良，例如改變膚色。雖然評價會上升，但係就會降低生存率。

只要草食龍比肉食大隻就得，即係梁龍可以同角鼻龍一齊養，不過部份龍例外

改良 DNA 之後評價會提升，不過會降低存活率

系統簡單易上手訓練最強恐龍明星

遊戲系統非常簡單，基本上只要滿足三大需求就可以輕輕鬆鬆玩恐龍。三大需求分別係：遊客需求、恐龍需求、安全需求。

要滿足各需求亦都唔難，先講遊客需求，只要恐龍種類、數量夠多（當然恐龍評價越高越好），酒店、餐廳、購物中心起足晒，有埋交通工具的話就自然會升到爆燈。

恐龍需求就仲簡單，只要滿足晒佢地對草地、森林、食物、水源、社交（呢樣好搞笑，需要同種類恐龍先會加社交數值，甲龍表示聽唔明劍龍講咩）等需求就會安安定定係個籠入面玩（暴風來臨時例外），當然肉食龍的話會有隱藏需求，後面會再講。

至於安全需求，有睇過電影都知道每次公園都一定出事，維持公園既安全就搞掂。不過公園內部都有內部鬥爭，如果該部門滿意度太低就會刻意搞破壞，呢個時候就要睇玩家既應變能力啦。

所有需求都處於藍色狀態，就會乖乖地留係籠入面。（當然會有突發情況）

最基本就係有野食、有水飲、有足夠活動空間（恐龍都對生活咁有要求，再望下香港啲樓……）

恐龍破籠而出的話，就會對遊客做成傷害，不論係肉食定草食龍都會

當滿足晒呢啲基本需求之後，就可以玩真正既元素：培育恐龍明星

呢隻遊戲既肉食類恐龍就算滿足晒需求都會有機會撞籠逃走的，因為其實肉食恐龍係有一個隱藏需求「捕獵」。要滿足呢個需求既最基本就係設置活餌比佢地食，另一個滿足呢項需求既方法就係令佢地互相廝殺。只要將同尺寸但唔同種類既肉食龍放埋一齊，佢地就會打交，弱既一方就會比打死，而生存落黎既就會得到死去恐龍既一半評價分做獎勵。換言之只要不停生產較弱既龍去養另一種龍，評價就會不停上升，只要你有一隻高評價恐龍，遊客就自然會增加。

透過不停廝殺，就會增加恐龍評價

不停培育評價就會一直上升，圖中速龍數值就超越大佢一個 Size 既角鼻龍既倍

手動駕駛更有效率拍照模式含隱藏玩法

當恐龍病咗，又或者佢地逃走既時候就要出動工作人員去作出相應動作，雖然可以指定工作等佢地自動完成，不過效率都幾差下。呢個時候可以選擇自己直接操控部隊，去籠入面幫佢地打針，維修設置等等，效率高之餘又可以用近距離入園玩，別有一番風味。

自己入籠度打針效率高好多，而且可以近距離同啲龍玩

當然亦都可以指派工作比電腦執行，不過 AI 比較蠢，做野都幾慢下

另外手動操作地面部隊時，係可以進入拍照模式的。系統會評價照片既構圖、恐龍種類等等元素去評分，越高分就會越多錢。去到後期島嶼前期會係極度缺錢，呢個時候就可以利用拍照模式搵快錢。係拍照模式其實仲有樣變態玩法，只要你打開肉食恐龍個籠，然後尾隨佢。一路睇住佢食人一路影相，你就會發現咩叫財源滾滾來……至於啲遊客……R.I.P.囉。