《No Man’s Sky》（）係 2年前推出，面對真正無人既深空，令到無數探險者頂唔順而棄 Game。但係啱啱迎黎既「NEXT」版本大型免費更新，終於加入多人連線以及自由建造基地等系統（詳見），終於令到一眾玩家受落，配合 Steam 做緊 50% 減價優惠，大量玩家再次進入無盡太空探險，並且令到遊戲再次進入 Steam 暢銷榜！
睇返 Steam Charts 數據，係《No Man’s Sky》「NEXT」版本大型免費更新後，同時在線玩家激增至 5 萬 4人，之前既 1.3 更新「Atlas Rises」最高峰都只係去到 1 萬 9千人，增長幅度完全無得比！而且最勁既係呢次更新成功令到《No Man’s Sky》係推出二年之後再次進入 Steam 同時最多上線人數頭十名，的確係好勵志！
由今次事件見到，如果營運方係有決心正視問題，並認真去解決的話，玩家係受落的，Hello Games 今次為業界做咗一次非常好既示範：回應玩家既訴求先至係長遠致勝之道。
如果有興趣想加入太空探險既朋友，係呢段時間要把握機會啦，因為 Steam 正做緊 50% 減價優惠，原價 HKD $468，而家只需要 HKD $234 就得，呢個優惠只係做到 7 月 28 日淩晨一點架咋！
《No Man’s Sky》同時有 PS4 / Xbox One 及 PC 版本，而今次「NEXT」版本大型免費更新適用於所有平台。
VJGamer總編，細細個已經蒲機舖，機齡甚深，熱愛電玩文化。