黑獅係最大隻，因為係合體變為機械人既主體部分，靠佢連接四肢，拎上手都好結實，砌完亦覺得好滿足。有幾個位置值得留意，其中變身後既膊頭鉸位，佢用大小齒輪加 Ball Joint 既砌法都幾新奇。不過個人最喜歡既都係 Voltron 頭部既變形，簡單得黎又 work。嘴巴位置由原作嘅拼砌變成印件就名花入各眼啦。本人覺得效果係靚左，所以問題不大。講到印件，呢隻獅頭部亦有一塊印左既Nexo Knight 盾，相信呢塊大家會比較歡迎，亦期待睇下各位 MOCER點活用呢塊件。

雙手

紅獅同綠獅既結構一樣，頭部用2個大ball joint，所以只可以上下移，不可以360度，獅型態時不能向下垂，若然改用單一大ball joint，可大大增加可動度，但有機會影響變為手部時可承受重量的力度

砌的時候會覺得前後腳砌法相同，理論上應該後腿比較粗壯，不過翻查資料後，原來百獸王設定上是前後腳一樣，所以lego版本亦忠於原著。另外我很喜歡大腿的淺灰2x2round tile印件，放在關節位置非常合適。另外獅形態時4肢比較幼，腳板形狀亦不太理想。

今次砌法亦用左好多SNOT 的砌法，值得學習。另外有很多新件，例如一些新的電鍍銀件及1X1 的BRACKET等，都係MOC好好用的零件。

雙腳

黃獅藍獅結構相同，係合體後的左右腳部分，比作為雙手部分的紅獅及綠獅多一包。獅子的主骨幹，以technic件及bricks 互相配合使骨架十分穩定。另外，設計者以木桶來當作黃獅子背上的炮口部分值得欣賞。

黃獅頭部比較圓，相反藍獅頭部較尖，設計幾好幾有心思，簡潔同時也忠於原著。比較可惜既是，同紅獅綠獅一樣，為遷就合體需要，頭部的可動範圍有限，只能上下移動。不過唔洗遷就拎劍同盾牌，獅口可以上下開合。四肢部部盡量忠於原著，亦同紅獅綠獅一樣有印刷件，但出現同樣問題，就係獅子形態時略為瘦弱。

武器

劍正睇幾好，但背面就比較失望，完全無修飾過。盾牌的表達好好，用左好多電鍍銀，好超合金玩具個種feel，外形亦好似飛標，還原度非常高。另外，如果可以做多少少，跟返原著每隻獅子都有各自既武器就更好啦。

合體

黑獅變形既步驟相對多，其中最欣賞頭部既變形，唔洗拆件換件，下巴直接向下反就會見到機械人面部。而黑獅四肢因沒有任何關節，所以變形時要拆開，調整到合適角度再組裝。

其餘四獅都係先將獅子既四肢摺起，插入黑獅到，合體成為機械人既雙手雙腳，雙腳有2個位幾欣賞，第一係獅身底部加上車軚，主要為合體後在腳板下增加摩擦力，呢個設計值得學習。第二係合體時，獅子頭要向上反90度，你會聽到click一聲，好似玩緊合金玩具咁。

合體後正面睇外觀幾靚，大大部夠霸氣，每個部分亦有少量金屬銀色件同印件點綴，非常吸引，不過背面全部都係 Anti-studs/Tubes，同之前提供大劍個情況一樣。可動方面，頭部可左右轉，膊頭手爭拳頭可小量前後移，所以基本上係得一個pose，就係盒面個張大相。

總結

總結一下，第一當然係忠於原著既問題，我覺得呢方面做得好好，獅形態同機械人形態都好貼緊原著。

第二係要外觀，本人期望成品係盡量無粒化似合金玩具，所以幾欣賞獅子既外觀同機械人既正面，特別係盾牌充滿金屬感既外觀，不過黑獅背面無任修飾真係好失望，可幸係獅子 mode 時大部份都係比對翼遮左。

第三係要係可動同可玩度既平衡，好多時要就合體，又唔想太鬆散，都會將可動度降低甚至放棄某d關節，但係唔影響合體結構既話，基本可動係必須。而今次百獸王既可動都叫可接受，基本既頭同手可動都做到。

第四係拆件變形問題，變形既定義係，變形過程中唔拆任何件(除非原著係變形或合體過程中要拆件換件)。係呢個定義下，百獸王既變形合體方式有好大既改進空間。其中最失望既地方係黑獅變形時四肢需要拆開再組，雖然明白官方出品非常著重穩固性，亦相信 Designer 一定有探究過唔需要拆嘅可行性，但始終令變身過程有點美中不足。

總括黎講，Lego出百獸王呢類作品係一個新嘗試，亦係一個好開始，作為官方史上第一盒既合體懷舊機械人，百獸王雖然有d部分唔太理想(Anti-studs，拆件變形等)，不過都有唔少亮點（電鍍銀，膊頭節能Ball Joint），可見Lego公司充滿誠意，最後會唔會第二，第三隻既合體機械人，就要靠大家既支持啦！

p.s. 多謝Lego公司提供俾我地做開箱文，好開心可以同JOE、脾脾、Wallace同Amy一齊完成，第一次5個人一齊set

p.p.s. 記住投大獸神一票啊！//ideas.lego.com/projects/171752