好耐之前我地介紹過呢隻恐怖潛入遊戲《Hello Neighbor》，呢隻遊戲既敵人會因應玩家既行動而不停修正自己既防禦策略，面對住不停進化既敵人，的確係既緊張刺激。可惜當初推出時就只有 PC / Mac OS 同  Xbox One 版本。不過最新既消息係，《Hello Neighbor》即將會登錄 PS4 / Nintendo Switch / iOS / Android 四個平台！

《Hello Neighbor》講述玩家附近黎咗個新鄰居，而呢個鄰居既行為就非常古怪，係佢間屋仲有個被重重封鎖既地下室，而玩家既任務就係要潛入呢個神秘鄰居屋企，解開地下室之謎！當然呢位鄰居見有人入侵亦都會格殺勿論，所以玩家就要思考用咩方法潛入間屋，又點樣逃走。

遊戲最大既特色就係呢位鄰居係使用 AI（人工智慧）設計，佢會因應玩家過往既行動做出相應既防禦。例如玩家之前選擇由窗爬入，神秘鄰居就會係窗口擺定一隻捕獸夾陰你；選擇由大門潛入，神秘鄰居就會裝部 CCTV 監視；如果玩家失手被發現的話，佢仲會行捷徑捉你，的確係幾痴線！

遊戲推出之後，雖然評價褒貶不一，不過呢類型既遊戲市面上的確較少，有興趣挑戰既朋友可以嘗試一下。

《Hello Neighbor》 PS4 / Nintendo Switch / iOS / Android 將於 2018 年 7 月 27 日上市。