真人互動電影遊戲其實唔係咩新鮮野，簡單講，就係整個遊戲都係真人影片，選擇指定選項就會播放相關片段咁（就類似 PS4 早排隻《Hidden Agenda》咁，不過就轉晒做真人影片）。Wales Interactive 以製作呢類遊戲聞名，今次佢地就為大家帶黎新作《The Shapeshifting Detective》，最快今年年尾就有得玩啦！

《The Shapeshifting Detective》遊戲講述一宗神祕謀殺案發生後，被預知即將有下一位被害人，但係我地既線索就係知道有三位占卜師可以預知下一位被害者身份。但係佢地亦唔打算透露任何資料比人知，好在玩家既真正身份係一位超能力人士，可以變身做任何人，包括下一位被害人……故事就由呢度開始。

玩呢類遊戲最怕既就係重複又重複，係《The Shapeshifting Detective》入面就有超過 1600 個全高清 FMV 影像（Full-Motion Video）。每次開局系統都會隨機選擇一位角色為真兇，而且有大量分支，因此玩家每次遊玩都會睇到新既片段，耐玩度有保證。

玩家可以變身做遊戲內九位角色，分別去 Chok 其他角色講野，當然仲會有唔同地方去比你探索。

《The Shapeshifting Detective》預定係今年第四季上市，對應平台為 PS4 / Xbox One / Nintendo Switch / PC。