絕地求生嘅故事題材一直係遊戲界熱門主題，今次介紹呢隻《Remnant: From the Ashes》相信都適合唔少玩家口味。遊戲由開發《Darksiders III》嘅 Gunfire Games 製作，預計 2019 年同時登陸 PS4、XBox One 以及 PC。

遊戲劇本講述玩家身處嘅世界，因為比異次元生物「Root」入侵因此陷入末世，殘存嘅人類就不斷嘗試鑽研僅餘嘅科技，希望搵到方法擊退「Root」；同時又好矛盾地，人類必須透過傳送門，進入到「Root」所屬嘅異次元世界去尋找資源。簡單黎講，為咗生存落去，每日就係不斷的戰鬥！

遊戲可以單機，亦支援最多四人同時線上遊玩，係一隻第三視點射擊遊戲；而頭先提過嘅異型生物「Root」有大有細，基本上一離開據點就要開始打，而地圖上唔同地方都潛藏住「Root」嘅頭目，所以要通關拯救世界做英雄絕對唔容易。

除咗核突異型生物要打之外，玩家仲會面對一班人類敵對組織，目前未知佢地係為咗爭奪資源、定係有更深目的，反正世界大亂嘅時候人類都係唔能夠團結呢一點，就絕對反映現實 LOL！

當然啦，末日求生當然唔係一味靠打的，玩家同時要同 NPC 進行交流、或者進行 NPC 拯救支線任務，因為咁樣可以幫你解鎖到新科技同資源，從而強化你嘅 Gear 以及據點。

遊戲目前仲有好多謎題未公佈，預計黎緊 8 月嘅 Gamescom 遊戲方會再推出更多資訊！有興趣嘅朋友不如參考以下呢套官方 Trailer 先啦～