大家仲記唔記得早排有位外國少年，靠自己既努力將恐怖神作《P.T.》重現人間，仲要免費比人下載呢件事？最近呢位少年 Qimsar 就發出咗一份公告，內容除咗多謝大家既支持之外，仲透露佢收到 Konami 代表人員既電話，要求對方將《P.T.》PC 版下架，然而你以為 K 社今次又想辣火頭啦，但事實上今次既發展係幾令人意外。

事源係外國一位 17 歲少年 Qimsar 獨立開重製 PS4 恐怖神作《P.T.》，而且完成之後仲比人免費下載，呢件事引起咗 Konami 既注意，因涉及版權問題所以收到 Konami 既電話並要求佢將遊戲下架，面對呢個要求 Qimsar 只可以答應對方。

但係 Qimsar 透露，今次 K 社接觸佢並唔單只係叫佢下架咁簡單，而係正式邀請佢成為 Konami 既實習生！

其實一直以黎，都有唔少開發者嘗試重現《P.T.》，不過就只有 Qimsar 成功。亦因為咁先引起 Konami 注意（K社代表人員直言重製版係公司內部非常受歡迎），亦都令佢地醒悟到小島秀夫出品係市場上仍然好有影響力，所以對重啟製作《Silent Hill》再次有返信心！（但係無小島你哪來的自信？）

當然無論點都好，K 社係今次事件上面都展現咗佢有氣量既一面，首先並無對《P.T.》提出侵權訴頌，其次亦都伸出友誼之手邀請 Qimsar 進入公司實習，呢個行為對佢之後既發展一定有幫助。至於重啟《Silent Hill》黎講……無小島就真係差咁啲……。