橫向動作遊戲一直都不乏捧場客，但係高質素既作品就並唔係咁多，今次介紹呢隻《Dead Cells》之前就係 Steam 上面進行搶先體驗階段，並且獲得極度好評。呢隻一致好評既作品終於完成體驗階段，推出完全版，並且會係 PS4 / Nintendo Switch 同 Steam 上同步推出，對自己技術有信心既唔好錯過！

《Dead Cells》由法國獨立研發團隊 Motion Twin 製作，類似銀河戰士、惡魔城類型（Metroidvania ）動作遊戲。遊戲場景係一個會不斷變化既城堡，玩家透過不斷探索、擊敗 Boss 去解開新既力量，武器等等。

遊戲內係不設 Save Point，亦都唔洗諗住靠屈 LV 就可以過關，呢隻遊戲靠既完全係玩家既技術。而且遊戲內不論係 Boss 定係雜魚都非一般地強，必需善用各種武器及法術殺敵（順帶一提玩家可同時攜帶兩件武器及兩件道具，淨係諗點配搭都有排玩，而武器及法術有成八十種以上）。

此外遊戲採用非線性關卡，亦即係可以隨意探索多張地圖，當然由於難度高既關係，手殘玩家可能會好快棄 Game……不過呢類遊戲只有多練習、唔怕死先係破關關鍵！

《Dead Cells》將於 8 月 7日正式上市，對應平台為 PS4 / Xbox One / Nintendo Switch 及 PC Steam，支援繁體中文。