賽車遊戲大家就玩得多，點先為之一款好既賽車 Game 人人都有唔同標準。有人鍾意《GT》系列咁樣，以真實感為第一標準；有人鍾意《Need for Speed》咁，可以自由自在咁周圍行；亦有人鍾意《Mario Kart》咁，與眾同樂先夠高興。咁去到《The Crew 2》又係點呢？我諗呢隻遊戲用「豐富」、「抵食夾大件」黎形容就啱晒！
畫面水平維持一貫大廠水準
先講講遊戲畫面，係車身材質貼圖表現中上，雖然未去到話令人驚艷既地步（當然你拎去同呢類比當然會輸），但係都係 Ubisoft 一貫水準，絕對收貨。不過去到背景部份真頗為失手，不論材質貼圖又或者模組都做得頗為求其，同返第一集相同地方比較之下，明顯見到今集背景差過上集。當然賭城、自由神像你都仲會認得出既。
背景畫面都出出地事，幸好都仲認得出係咩黎
同返第一代比較，背景明顯做得 Hea 咗
同《Forza Horizon 3》對比，但係載具豐富程度《The Crew 2》遠勝前者
架車無論點撞都唔會爛，最多刮花
操作簡單易上手 適合優閒型玩家
競速類遊戲係操作上面好多時分別都好大，有真實系既《GT》系列、甩尾甩到痴線既《Ridge Racer》、自由度高既《Need for Speed》等等，《The Crew 2》感覺上就係類近後者。簡單講就即係唔洗準備入彎前已經要減晒速落晒波先，臨到先剎係無乜問題的，呢種玩法只要玩過條賽道 1-2次基本上都可以輕易掌握點玩，適合無乜時間既優閒型玩家。雖然容易入手，但係由於競賽類型繁多，所以都需要時間去摸索唔同車種既特性。（最正係唔同既賽道入面成日會搵到捷徑，成件事好《孖車》）
即使係呢種極長既賽道，玩多幾次就會掌握到竅門
個人覺得最難玩既係飄移賽
故事模式夠自由 賽事種類極豐富
去到遊戲最核心既部份就係故事模式，遊戲內設置一種類似「等級」既系統「追蹤者」，透過贏得賽事又或者係自由駕駛情況下做出特別技巧就會增加「追蹤者」人數，隨住人數增加而解鎖更高級別既賽事。除咗解鎖賽事之外，當同種類賽事進度足夠時就可以挑戰該項目既皇者，目標係戰勝佢成為俱樂部既一哥。
只要完成一定數目既比賽，就可以挑戰該項目既冠軍
擊敗冠軍之後，就會得到特殊載具
不過無得拎黎比賽就有少少可惜
當玩家去到「名人堂」級別先係遊戲正式開始，淨係街道賽已經有「一般街道賽事」、「飄移賽事」、「直路加速賽事」等等，仲未計「越野賽」、「花式賽」、「專業競速賽」等大項目，每個項目入面又會再分為四種類型賽事，真係豐富到嘔。而且解鎖晒全部賽事參賽資格之後，仲會有「Live 比賽」，係同人條賽道上，需要使用唔同載具去完成比賽，即係先係雪地賽，飛過高台之後變成賽艇，最後返到城市街道賽衝線咁，比賽一氣呵成，爽度十足！
去到「名人堂」級別先係遊戲正式開始
賽事種類繁多，每種比賽仲有有2個難度選擇，真係好耐玩
競賽項目極多，上天下海乜都有，就連賽艇都有分競速同越野
刷裝育成元素 改到愛車快過小明
《The Crew 2》一開始已經可以買晒所有載具（前提係你有錢），雖然初始數值有分別，但係去到尾整合數值都係一樣的。即係話只要有愛，你既載具都可以改到快過小明！
要升級載具，靠既唔係錢，而係刷「零件」。只要係故事模式內既比賽贏到 1 或者 2名，就會有隨機 2-4 件零件比你，當中會有分綠、藍、紫三隻顏色，藍色及紫色零件都會分別附加 1 及 2 種技能，透過組合技能就可以整出一部你所獨有既載具啦！
隨機跌裝，不過要刷到全身紫裝其實都唔係咁難
每件紫裝會有2個技能，藍裝就得1個
砌到最後其實數值上限一樣，分別係技能組既不同
豐富自訂元素，可以自訂既野多到嘔（連自己個人都有得扮靚靚）
仲可以自己 Design 架車
又或者 Download 人地既 Design
總結
《The Crew 2》坊間評價就非常二極，但係對我呢類優閒型玩家黎講的確係唔錯既選擇，操作唔會太複雜、畫面達標、速度感又夠，老實講真係算係咁啦。基本上遊戲以「抵食夾大件」黎形容就啱晒，一個價錢玩晒咁多類型載具，去邊搵？
VJGamer總編，細細個已經蒲機舖，機齡甚深，熱愛電玩文化。