文長，涉及劇透，總結在最尾，想睇評分可直接跳到最後。

同樣以人工智能進化為題材既兩款作品，WestWorld 同Detroit: Become Human 有極多不謀而合之處，除左係因為好大機會有借鏡成份之外，亦有可能係只得呢幾個情況先至表達到人工智能呢個情景需要表達既野。(注意呢度用字係需要極度中立，人工智能係呢度並非起義，叛變，甚至唔可以寫得到情感或者自由，而係再中立D 既，進化) 所以以下將會係電視劇及遊戲混合既觀後感，而非遊戲評論。(事實上Detroit 亦都冇乜野值得評論，點呀？個QTE 太難撳咁呀？)

或者我要承認自己老了…….Detroit: Become Human 入面既橋段係遊戲上來講，我上一次見到已經係2007 年既Bioshock，除左當年同時間非常優秀既戰鬥同世界觀設定為佢贏盡掌聲之外，其中故事橋段既終極Plottwist 更令佢成為遊戲界既一代經典。

而事實上，Detroit 既Plottwist 比起Bioshock 更深入，更恐佈，但係我已經只係「哦」。明白左就算，到底係因為我慣左，定係我心靈上已經感受唔到呢種文學級既情節鋪排？

Bioshock 既主角係謎一般既事件之後去左一個常識中冇可能出現既地方，同時有個人一路比提示佢繼續向前行直至完結整個事件。到最後一步主角先明白，原來所謂既提示其實係指令，自己竟然係一個複製人，一生只能聽從別人既指令做事，根本連半分既自由都冇。最有趣既係，自電子遊戲發明以來，遊戲既玩家又有邊個唔係有意無意咁跟住遊戲既指示去完成遊戲比你既目標？咁多年來我地竟然從冇疑問過，直至到Bioshock 既時候我地仍然唔知點解但係都照跟指令去做，完全唔覺有問題。最後我地全部人都發現自己只係奴隸既命運，其實就係由呢種跟隨既性格開始。

玩家既眼界隨即擴闊，我地開始疑惑一直以來係我玩遊戲定係遊戲玩我？而既然RPG遊戲中既提示或者任務，可以話係主角人生必做之事。咁我地自己人生中果堆所謂既必做之事，其實又係咪一定要做？係我生活緊，定係人生係度玩緊我？能夠從一個遊戲之中令人質疑遊戲既本質，甚至乎人生，呢種就係所謂文學級既情節鋪排。

呢度帶入WestWorld 第一季既劇情。Maeve 係第一季中段開始叛變，復仇，仲透過武力同埋自己既個人魅力逼到唔少既人類去幫佢。但去到離開樂園既最後一步，佢透過Bernard 發現自己所謂既清醒、叛變，甚至乎係新既能力，全部都係某人一早係佢既程式入面強行編寫入去。Maeve 既每個行為同選擇其實都一早已經寫好，所謂既直覺同想法其實只係程式執行既過程。

Maeve 望一望自己隻手，我都同時望一望自己隻手。到底乜野係真，乜野係假？我地生而為人咁耐，到底有冇試過真係做過一個決定？定係我地所謂既選擇，行為，直覺同靈感其實都已經一直鋪排好？我們每次有想做既事，又係咪只係比人逼？我地所有覺得理所當然跟住去做既事，其實係咪都比人玩緊？

係呢度，我地睇埋Maeve 個女，當初樂園既劇本就係Maeve 有一個女，因為佢地係黑人而WestWorld 又係設定係191X 年既關係，佢地係負責比人用來欺壓玩弄既苦命種。Maeve 對呢一個細路女機械人有強烈既感情，因為劇情上佢就係一定要保護佢。而Maeve 係清醒之後，甚至明知自己係比人玩之後，佢仍然係第二季踏上尋女之路。呢度我地睇緊既係人既自私以及情感行為。

好多人會質疑救一個機械係值唔值得，而且仲要係同自己本身毫無關係既機械人。但呢個問題對Maeve 來講意義不同，因為佢都係機械人，如果自己係一個有意識既生命，咁佢個女都一定係，咁救佢就有價值。而即使佢地既母女關係只係樂園強行幫佢地安排，佢既自私亦令佢既行為變得正當。冇錯，救人係自私既，自私就好多種，包括對自己，對自己愛既人，甚至係對所有人。

Maeve 為救自己個女，利用身邊所有人，殺左無數個佢定義為「有生命」既機械人，最終先見到佢一面。Thanos 話要殺哂全宇宙既一半人，係為左生命帶來和平。復仇者都話唔得架！因為殺人就一定係唔啱，即使呢個決定會殺更多人都一樣。呢個係想保護所有人既擴大自私。

大家有冇開始留意到我地一直以為理所當然既母愛，保護自己同其他人既行為，其實只係……比人玩緊。

而由呢度跳到去Detroit 就更為有趣。機械人係一種被寫出來既程式，其實本身唔應該有獨立思考，甚至乎覺醒左既Maeve 都明自己原來從未選擇過。偏偏Detroit 就係一個關於選擇既遊戲，而且係我地代幾個機械人主角做選擇，即係我地既選擇就係佢地既直覺同想法，而機械人既直覺同想法其實應該又係一早已經編寫好既程式。咁即係……我地其實有冇得揀架？

“We never had free will, just the illusion of it.”

我個人非常欣賞Westworld 每次開場都有一個機械人彈緊琴，但最後即使放手個琴都係會自己郁，因為個自動琴一早已經有樂譜，無論如何都會自己彈。仿佛就係到嘲笑緊劇中既機械人果種無謂既掙扎，佢地仲以為自己做既任何事可以改變到本身既規律，但實情係無論佢地做乜定唔做乜個故事都會一路咁照做落去。

Detroit 就係一個咁樣既遊戲。遊戲中唯一無乜限制既就只有Connor ，其餘兩人無論你點揀都一定會保護Alice 同埋一定會去革命，呢兩條線既所謂選擇真係可以不理。不過亦唯有Connor 最為有趣。Connor 其實就等於Bioshock 既主角，亦等於WestWorld 既Delores，佢係唯一可以阻止同埋完成革命既人。而人類 (Cyberlife 公司) 其實一早知道佢會做乜野，而亦一直監視住佢。如果佢阻止左革命，咁佢就完成左佢本身既任務。如果佢完成左革命，Cyberlife 亦可以控制佢令公司既計劃更進一步成為政治意義上既獨立王國。如果佢完成革命得來奪得左自由，咁Kamski 就可以證實佢真係整到有意識既人工生命，人類文明又邁前一大步。(詳見WestWorld 第二季人類既永生陰謀)

“I knew what she would do, I didn’t compel it.”

Conner 比起其餘兩人更接近自由，但無論你點揀，人類最後都會贏 (睇你點定義贏)。最恐佈既係無論你點揀，都會有一個陰謀係你無法抗力既情況下繼續落去。作為玩家，我地再點努力去做不同既嘗試，係有限既選擇之下，我地仍然係主角同故事既流程之中，無意地為其他某人完成左佢地既計劃。

我地從來都冇選擇過。

比起Bioshock 果種單線既跟隨指示冒險，甚至係WestWorld 咁只係作為觀眾睇住件事發展。Detroit 呢種經過玩家選擇既互動最後所揭示出來既陰謀更加令人心寒同疑惑。Maeve 想當初叛變既時候，係咪都同我地一樣做過呢D 咁無謂既選擇，最後只係得出同一個後果？Delores 佢而家選擇既行為又係咪都只係成全緊某人既陰謀？

所謂正確既選擇

所謂人類，其實都只係佢做過既決定係集合體，所謂靈魂同意識，亦只係不知何來既力量，驅使人類做出決定既表象而已。我地所做過既所謂正確既選擇，究竟係基於咩因素考量而得出？而如果人類寫出可以叛變既機械人，又或者已經有能力將意識數碼化，最後得出既結果，果個「靈魂」其實有冇真正既思想？

Westworld 第二季之中，終於揭示William 果種暴戾既性格其實只係研究項目之一，佢係不知不覺間，早已經跳過左實驗室階段，直接將意識實裝左落機械人到。

我有寫過，WestWorld 第一季Ford 既目的係證實機械人有真正、發自自己既意識，咁等同於創造左生命，非常重要。第二季中，William 因為對世界既經歷同不信任，佢殺左真正既人類，殺埋自己個女。雖然最後佢既推斷係正確，果個「女」的確係派來試探既機械人，但係冇查明既情況之下，William 就出手殺左佢自己唯一在世既親人。在外人睇來，佢已經癡左線！

冇錯！一個經收集數據而彙整而成既數碼化意識，最終能否變真，就係睇下佢可唔可以癡線！因為係人工彙整既關係，而對象又始終處於理性狀態，佢係被復製之後都照樣保持理性咁你又點會知你個意識係本身咁樣定係你搞到佢一定理性呢？

William 最終陷入瘋狂，同第一季Delores 發現自己既意識一樣，都係證明緊Delos 公司既研究成果，同時推進緊劇情。

反觀Detorit 之中，所謂正確既選擇就更為可笑。大家如果有仔細留意Detroit 既主畫面，應該會明白玩家其實係一直同Chole 一齊玩緊一個模擬遊戲，所有既UI 其實係個遊戲入面既遊戲果個UI，而Chole 就係度監察緊我地點揀。Chole 更一再強調呢個係「我地」既故事，我地根本就只係一個受控既AI 駁左落VR 係度玩緊一個實驗！

正確選擇？哈！~

所謂保護細路女，所謂革命，都只不過係當下玩家覺得邊一個情感上，甚至係攻略上適合既其中一條路。就係咁就成為左角色佢地既直覺同行為，而又由於遊戲選項有限，我地只能夠揀最貼近自己心中既果個答案，其實所有野根本安排好哂。