勇奪今年 E3 電玩展最佳動作遊戲既《Anthem》，由公布至今雖然望落一直都唔錯，但係一諗到 EA 二個字就硬係有種伏味。不過早前官方放咗條任務實機試玩影片出黎，展示其中一種裝甲 Colossus 既玩法，以及任務「Scars and Villainy」流程，睇完之後成個人定晒，大家都可以放心等啦。

《Anthem》係由製作《Mass Effect》團隊 BioWare 開發既科幻射擊新作，雖然由 08 年加入 EA  之後都有失手作品，不過就今次 Gameplay 睇落就正正常常無失手。

遊戲內玩家會著住好似 Ironman 咁既動力裝甲（Javalins ），唔同既裝甲會有唔同既特性，今次影片展示既裝甲為「Colossus」，特性為犧牲機動力換取高火力及高防禦性能。有趣既係即使係同一款裝甲，根據選取既裝備，亦會有唔同既攻擊性能。

多人遊戲可以選擇同類型裝甲

今次影片展示咗唔少遊戲細節，遊戲好似《Desinty》咁，即使係非任務區域範圍內，依然會配置咗怪物係度，並且會有精英怪物，可以選擇直衝任務地點無視佢地，又或者清完怪先行。而每具動力裝甲都都有飛行功能，不過飛得太耐會導致引擎過熱，只要經過瀑布或者飛入水中可冷卻引擎，相信遊戲正式推出時要善用此系統。

可以唔理佢飛過都得

Boost 條 Bar 變紅即係過熱，飛過瀑布過一過冷河就搞掂

另外係《Anthem》內，加入好似格鬥遊戲既「Combo」系統，當隊友施展有控制屬性技能又或者特殊傷害技能，係特定時間內協力進行特殊攻擊，便會達成「Combo」要求，並會附加額外傷害。係影片最後打 Boss「Swarm Tyrant」時，就多次使出「Combo」重創敵人，屬必須掌握技巧。

配合其他玩家攻擊可以做出「Combo」效果

玩家可於任務中途加入，似乎可以等朋友就打完果陣入去做 Free Rider

《Anthem》預計於 2019 年 2 月 22 日上市，對應平台為 PS4 / Xbox One / PC。