由《PUBG》、《Fortnite》掀起大逃殺熱潮之後，大量同類型作品推出，雖然主題各有不同但係都大同小異。不過今次介紹呢隻由 Vostok Games 開發既《Fear The Wolves》就加入多種新元素務求突圍而出，當中最特別之處就係玩家要面對既唔單只係敵人，仲會有野生既狼群攻擊你、極端變化既天氣等等，頗有心思。

《Fear The Wolves》遊戲背景設定係著名洩漏輻射既景點 – 切爾諾貝爾（Chernobyl）。同一般大逃殺遊戲一樣，可以玩單人模式或者小隊模式，不論邊種模式都好，勝利條件並唔係要殺到最後一人，而係要搭上幫你撤離既直昇機，暫時仲未知道直昇機可以載幾多人，不過係上機地點肯定會有一番激烈廝殺！

遊戲除咗要面對其他生存者，仲要小心附近既狼群，佢地會追蹤玩家，並且有致命性威脅（好想引堆狼去人地度攬炒）！而且根據官方資料，除咗狼群外仲會有異變人，之後亦會加入更多既敵人物種，相信會非常刺激！

暫時遊戲只有一張地圖，地圖位於切爾諾貝爾周圍廢墟 25 平方公里，包含河流、森林、被毀城鎮、隱藏軍營等。由於活動地區係洩漏輻射既核電廠，輻射將會隨機感染戰場不同地方，並且強度不一，將根據強度產生不同威脅。當然玩家如果取得防護裝備的話，就可以探索更危險既極限輻射區，入面自然會有更強大既戰利品。

而遊戲會設有時間流逝系統，空降時會係早上，而撤離時會變成黃昏。除咗時間系統 ，遊戲內既動態天氣系統亦都非常特別，特別在於死亡後既玩家唔再係無野可做，而係可以透過

投票決定天氣，並且繼續觀看決戰競技。官方亦都話之後會開放埋 Twitch 同 Mixer 觀眾都可以對天氣進行投票，而天氣都有晴朗、狂風暴雨等等。

《Fear The Wolves》將於 7 月以搶先體驗方式上架，對應平台 PS4 / Xbox One / PC Steam，詳細售價尚未公布，大家有興趣既可以去 Steam 頁面度關注咗先！