有「小島神」之稱既小島秀夫，離開 Konami 之前曾經製作一隻外間評價極高既恐怖解謎遊戲《P.T.》，由於遊戲本身係沉默之丘系列作品「Silent Hills」既互動宣傳片，當「Silent Hills」被宣布取消時，《P.T.》亦係於 2015 年 4 月 29 日由 PlayStation Store 上被移除，亦即係話係呢個時間點之前未有 PS4 既玩家係無機會體驗到呢隻作品的。不過最近外國就有位少年，成功咁重製呢隻評價極高既遊戲，並且放上網免費下載，可謂玩家之福！
《P.T.》採用第一身視點，玩家會係一間古怪既屋入面醒黎，並且係探索途中會有大量超自然事件發生。遊戲解謎難度甚高，基本上係無任何提示你要做咩的。遊戲可以移動既範圍極其有限，只有一條不斷輪迴既 L 型走廊以及二間房間，玩家亦都只有移動及查看物件二個動作。而要解謎必須係每次同過走廊後，細心留意走廊上既變化，從中搵出蛛絲馬跡黎破解。當玩家成功破關之後，原本用於「Silent Hills」既宣傳影片將會播放，係片尾仲會見到名演員 Norman Reedus 將會擔任「Silent Hills」既主角。
Norman Reedus（大家係小島隻新作都會見到佢）
呢位有位 17 歲少年 Qimsar，佢以 Unreal Engine 4「重製」《P.T.》呢隻遊戲，而遊戲既內容差唔多全部都係用返原遊戲內既素材，即係話非常之原汁原味。而且根據佢係 Reddit 上面表示，自己開發遊戲經驗係零，只係學過 6 小時 Unreal Engine、1 小時自行摸索 GameMaker、並用 35 小時熟習 Unity 以及 4小時熟習 CryEngine，而《P.T.》就係佢製作既第一隻遊戲，並且只係用咗 150 小時黎製作，都真係幾勁下！
《P.T.》重現，暫時可遊玩版本為 v0.9，雖然仲係測試階段，但係已經 100% 可玩。當然暫時仲會有唔少問題，例如無得 Save、無動畫、而且仲可能有 Bug，爆機之後亦都唔會見到「Silent Hills」果條動畫，不過對於無玩過呢隻遊戲既玩家黎講，唔洗再等 K社幾時大發善心開返比你玩已經夠晒啦！
《P.T.》遊戲 v0.9 現開放 PC 版免費下載，之後仲會有更完全版本，想玩住等既可以去呢度下載。
動漫電玩宅，極愛金田一系列，擅長動作及策略遊戲