台灣遊戲工作室「赤燭 Red Candle Games」上一次嘅作品《返校》得到各界極大迴響，雖然有好多網友反映話「唔係咁恐怖啫」，但係以台灣本土風俗歷史作為心靈系遊戲題材，的確成功成為遊戲界注目點！

今次佢地再下一城，推出以台灣 80 年代作為背景嘅恐怖遊戲《還願 DEVOTION》，故事圍繞一個「過度迷信」嘅家庭，佢地拜神，但係，佢地拜緊嘅係咪真係「神」呢？到底呢種狂熱宗教思想，會為佢地帶黎咩野災難？

「還願」顧名思議，係「拜神祈求一啲野，希望拜得神多就有神庇佑，願望會成真」咁嘅意思。故事講嘅係一家三口，因為佢地深信自己嘅虔誠，一定可以為自己帶來幸福；但係，佢地無諗過，佢地「幸福」嘅生活，居然正正因為自己嘅「虔誠」而將呢個小小的家變成一個煉獄。

遊戲目前剛剛先釋出 Teaser，對應機種未明，但係相信有《返校》嘅成功作鑑，遊戲絕對有可能落 Steam 同埋 Switch。不過，今次赤燭絕對係黎個巨大嘅自我挑戰，因為《還願》唔再好似上次咁用 2D 橫向卷軸操作，而係首次試用 3D 第一視點作為探索之用，唔知咁嘅設定會唔會令遊戲恐怖感進一步上升？

馬上為大家送上遊戲 Teaser，小心音量！