老任招牌作品《Pokemon》俘虜咗老中青三代無數心靈，真係比卡超一出，誰與爭鋒！咁強勁既作品當然會引黎唔少挑戰者啦，最新又最有實力既挑戰者，就係呢隻係 Kickstarter 集資成功既《Temtem》，基本上《Pokemon》有既元素佢都有（唔係講堆精靈阿），而且仲加入線上同遊要素，有極強潛力！

《Temtem》由 Crema Games 開發，同樣地係以收集野生怪物為主既遊戲。玩家活動既地區位於浮遊島 Airborne Archipelago，係島上會好似《Pokemon》咁，會遇到唔同類型既野生怪物，只要擊敗佢地就可以將佢捉返黎變成你既寵物。雖然大致上好多元素都同《Pokemon》相同（進化/屬性相剋等等有齊），但係細節上面亦會有分別。例如「多人 Online 探索元素」、「進化後有機會變弱」、「最大支援 2 vs 2 對戰」、「去除運氣元素」等等。

基本進化呢啲野就一定有 （怪物設計得唔錯）

最大支援 2 vs 2 對戰

好似 Online Game 咁，會見到其他玩家

除咗以上元素之外，係《Temtem》世界內會見到其他玩家，再唔係得件 NPC 係度同你講野。而且每位玩家都會有自己既小屋，仲可以好似《The Sims》咁比你自行佈置，雖然暫時未知有咩實際用途。

遊戲 Alpha 版將於今年 11月開始，而早鳥版本就會係 2019 年 9 月開始，正式上市日期 2020 年 5月，對應平台為 PS4 / Xbox One / Nintendo Switch / PC。