遇到災難之後應該點做？災難教學遊戲大家第一時間相信都係諗起《絕體絕命都市》系列，不過成個系列次次都玩到勁大，唔係地震就水淹（全靠佢我先知地震果陣應該點做）。但係係一啲小型事故，例如車禍咁樣，就比較少呢類題材既模擬遊戲出現。今次介紹呢隻《Accident》就係扮演車禍目擊者，係事故現場救唔救到人就睇你表現成點啦！

《Accident》由 ReachTheSky Studio 製作，屬於策略模擬類遊戲。係遊戲內，玩家將扮演一名車禍目擊者。當事故發生時，玩家雖要係有限時間內，盡力了解現場情況，再查看傷者狀況之後落決定應該做咩先。例如唔先放警告牌係路上，後面既車輛就會因為收唔切連你都撞死埋；又或者崖邊既車輛，無先轉移重心就貿然去救人的話，就會連人帶車跌落山崖等等。

救人前需要確認現場傷者狀況

唔睇清楚就行動，唔好話救人，隨時渣都無

當然大家都有機會選擇錯誤，係遊戲內會有「倒帶」呢個功能，可以返去之前既情況，諗清楚再搵出正確既做法。

炒晒都唔驚，有得回帶

去返之前既時間點，諗清楚再做決定

你以為救完人之後就完？遊戲仲有設計埋後續部份，例如警察會懷疑你；生還者想感謝你；死者家人想知道當時最後一刻係點等等，非常人性化。

據了解仲會有好多唔同既意外，連墜機意外都會有得玩，真係買黎當學下危機應變都好！遊戲將於 2019 年發售，暫時只對應 PC Steam。