相信好多玩家同我一樣，喺今年 E3 上面見唔到《FF7 Remake》嘅消息都覺得少少失望，不過諗深一層，明明遊戲前排先重新請人，如果咁短時間就整到新遊戲畫面出黎，老老實實都咪話唔驚。

《FF7》無論喺海內外都享有超高人氣，曾經有網友話「如此經典，就唔好搞 Remake 啦」，我原本都認同的，因為好多時重製都未必真係做得咁好，有時仲會壞咗件事，直至今次 E3 我見到《Resident Evil 2》……同樣係經典嘅呢個遊戲，喺一片保密當中，以勝利者嘅姿態，帶著超炫麗畫質同新元素，一下子成為今次 E3 嘅注目點。我地機齡甚深嘅總編亦不諱言，「今次 E3 所有大作都唔及呢隻重製 Biohazard 令我興奮」咁話。

所以，經典作品唔係唔重製得（高清化嗰啲就算啦），但係，你一係唔好做，做，就做到最好先拎出黎。

遊戲 Directer 野村哲也先生早前接受意大利遊戲媒體《Multiplayer》訪問時，佢都承認「FF7 重製嘅消息太早對外公佈了（I am well aware of the fact that we announced it too early）」。雖然佢有補充一點，選擇喺 2015 年公佈消息，係因為成個業界都察覺到佢地似乎著手整緊《FF7 Remake》，與其要玩家信啲流言，倒不如官方自己發表消息咁話。

不過，事情有時總不如人願嘅，大眾對遊戲注目度提高，團隊對自己要求就會越高，壓力都會越大。

雖然我地成日講笑話「Square Enix 好多遊戲都係都市傳說」，但係，拎返《FF15》黎做例子，2005 年遊戲以《FF Versus XIII》之名公佈，不過直至 2011 年都未進入正式開發階段，去到 2016 年終於發售時，大家應該都認同遊戲其實根本未完全開發完成，後半部嘅劇情一塌糊塗……

所以，野村先生話「而家《FF7 Remake》已經進入開發階段」，我地作為玩家嘅，把口就話「叫個孫燒比自己」，但係我個心呢……如果大家同我一樣都係想玩到好 Game 嘅話，認真，我寧願工作室慢慢整，慢工出細貨，唔好壞咗個經典呀。