我諗大家細個果陣，都一定有試過玩「每步都要踩係階磚入面，踩唔中就會比地下啲熔啱燒死」（係好低能好無聊），又有無諗過有人將呢個概念變成遊戲？Klei Entertainment 就即將推出一隻遊戲《Hot Lava》，遊戲內所有既地板都係灼熱既岩漿，玩家就係係呢啲岩漿玩住 Parkour（跑酷） 黎逃出呢個地方！
首先《Hot Lava》係一隻第一身動作跑酷遊戲，而玩法接近既就有 EA Games 既《Mirror’s Edge》，相比起黎個人比較鐘意《Hot Lava》。首先《Hot Lava》以美式漫畫畫風呈現（類似《Fortnite》）；其次係佢以大家細細個都試過既遊戲包裝，倍添親切感；再者係遊戲加入唔同既解謎要素，難度設定適中，唔會話卡關卡到懷疑人生，設計上的確有花過心思。
Klei Entertainment 仲特登整咗條片描述遊戲背景，好鬼有「G.I. Joe」味道！
遊戲目前已知既關卡有學校、體育館、遊樂場等等，配合返成個地下都係熔岩既幻想，玩起上黎格外過癮。同時仲會有好多跑酷動作，例如基本既跳躍、攀爬、盪繩、滑壘、踩牆等等，行動上亦都非常自由。當中除咗岩漿之外仲會有、毒池、冷凍液、無底洞等等各種陷阱，玩家必須利用各種跑酷技巧生存。
遊戲內有各式各樣機關及地形
遊戲支援多人遊玩，大家係跑跑跳跳既過程中會見到其他線上玩家，大家可以鬥快過關，亦都可以同朋友一齊挑戰。
《Hot Lava》係外國已經極受到關注，而家係 Steam 上面做緊 USD $9.99 買一送一優惠，雖然呢個只不過係 Open Beta 版本，但係官方強調完成度已經非常高，內容亦都非常豐富，要完全玩爆晒起碼都要幾個鐘，想試既朋友要把握機會啦！
中二病廢中，打機會自己講野自己笑，鍾意睇機械人動畫，貓世一。