《Dark Soul》系列除咗以高難度見稱之外，當中既故事設定及氣氛等等都令人非常驚艷。最近就有隻遊戲《Unworthy》，雖然並唔係咩大製作，宣傳亦都接近零（香港都無人報），但係遊戲內既難度、美術、打擊感等等，都非常有《Dark Soul》既味道，如果你話《Cup Head》係 2D版《Dark Soul》的話，玩過呢隻遊戲之後，相信你會改口。
《Unworthy》屬於獨立遊戲，基本上遊戲開發、關卡設計、角色描繪、發行等等，都係由 Aleksandar Kuzmanovic 一個人完成。 由於咩都係一腳踢既關係，所以係遊戲圖像處理上面用咗種好聰明既做法，就係主角、敵人、週邊場景等等都係用剪影方式表達 （遊戲主要色彩都係黑白灰），咁樣做就可以慳返好多繪圖工序，但係又神奇地好配合遊戲風格，一舉二得。
玩家係遊戲內扮演一位啱啱由墳墓甦醒既戰士，而角色動作同《Dark Soul》系列非常相似，主要都係翻滾、防禦、輕重攻擊，不過就無得跳。另外仲有唔少大家好熟悉既系統，例如由高處掉落係會扣血；打倒敵人後會得到「Sin」，即係遊戲入面既貨幣，如果死咗身上面所有既「Sin」就會跌晒落地，重生後要返去自己死既地方執返，同《Dark Soul》系列相同。
另外遊戲內敵人不但攻擊力奇高， AI 仲設定得非常好，敵人會調整自己既行動，甚至會破壞地形攻擊玩家，非常過癮！
開始時玩家只有劍同盾二種裝備，隨住劇情推進，就會解鎖其他武器例如錘、長戟、弓箭等等。有趣既係，呢啲武器除咗要黎打人之外，好多都會有附加既功能，遊戲裡面好多地方都需要借助呢啲附加功能先可以探索。例如錘係可以打爆由石仔推成既牆壁；又或者係滿地針既道路，轟爛上面既平台成為踏腳石；到後期仲會有傳送箭，可以幫玩家到達本身去唔到既地方等等。呢種設定令到大家唔會一把武器用到爆機，而係需要因應不同情況而變陣。
傳送箭特效好華麗
同樣會有唔同負面狀態
地圖表示方式就同《月下夜想曲》極為接近
相比起《Dark Soul》系列，《Unworthy》既升級系統就舒服好多，只要你有打怪，角色基本能力值就會成長，就算跌晒啲「Sin」都無乜所謂。
另外雖然遊戲主要色調係黑白灰，但係當中既光影、圖層表現極為清晰，光線表現非常有層次。由光猛既地放進入黑暗既地牢，就會見到純潔白光慢慢變成灰暗既燭光，非常細膩。而且遊戲內所有敵人受到傷害所濺出既血液仍然係紅色的，係黑白灰世界當中出現咁鮮明既紅，強烈對比下更顯出遊戲既詭異感。
《Unworthy》已經係 Steam 上架，售價 HKD $76，未來有機會移植到 PS4 / Xbox One 平台。
動漫電玩宅，極愛金田一系列，擅長動作及策略遊戲