咁多年黎，優質既四人連線生存遊戲選擇不多，《L4D》依然係玩家熱門之選，但係黎緊由原《Payday》設計師製作既新遊戲《GTFO》似乎有望成為大家既新寵，而且係啱啱過去既 E3 仲開放實機試玩，獲得外媒一致好評，絕對係今年不能忽視既遊戲黎！

遊戲由原《Payday》設計師等人所組成既 10 Chambers Collective 開發，大家需要係未知世界下既地下設施，尋找各式各樣資源，合力生存。今次 E3 實機試玩內容就係去廢棄設施底層回收「除污裝置」，當取得置之後有一位玩家就會因為要拎住舊野而無法戰鬥，亦都令到生存更具難度。

遊戲支援 4人連線合作，每名玩家係遊戲正式開始前都需要選擇武器及裝備，暫時見到基本武器都係突擊步槍、散彈槍等等，比較特別既係有一把泡泡槍，射出黎既泡泡會停留係面件表面，異形接觸到呢啲泡泡就會被凍結。另外仲會有唔少特殊工具，好似基本既醫療包、自動機槍塔、掃瞄偵測儀等等，暴走時隊友必需要互相配合先有機會存活。

泡泡槍凍結住啲異形

特殊工具自動機槍塔

就咁睇你可能話，「車！好多 Game 都有類似野啦」，《GTFO》同其他遊戲最唔同既地方，就係佢既所有武器彈藥都係有限的，為咗慳子彈，所以好多時必需靠匿蹤或者係暗殺殺敵。但係要靜雞雞殺人的話，就需要了解周邊環境係點，呢度就要進行類似《Payday》既踩點動作，先偵查，再暗殺。萬一比人發現咁點算，大家玩過《L4D》都應該知道咩叫暴走架啦？

為咗慳子彈，潛入暗殺係必需的

比佢觸手偵測到就會召黎大量異形，要極小心應付

當然遊戲內既生存機制係唔鼓勵你下下都直接衝突，當大家越係進行得多戰鬥，彈藥及補給品等資源就消耗得越快，亦即係越易死。除咗用匿蹤或者係暗殺之外，據了解仲會有路線選擇，選擇安全既道路避開不必要既戰鬥同樣可以達到慳資源目的。

唔好諗住有鐵閘就無事，異形識得打爆度閘的

另一樣特別既地方就係遊戲仲會有機會遇到機關，例如需要解鎖既電子門。呢個時候就要有一位玩家負責破解，其他三人負責保護佢。而進行破解既玩家唔似其他遊戲咁，撳實正方又或者 QTE 搞掂。係《GTFO》內玩家需要輸入真實既密碼，遊戲會一直比密碼提示你，但係記住你破解途中係有三位隊友幫你頂緊的，估錯的話就變相加重隊友負擔，即係又係滅團前奏。們準備排山倒海而來了。

亦有可能係需要由一至二位隊員去另一區域搜尋解鎖密碼，搵到之後再通知係前往電腦終端機前既玩家，然後先可以解鎖逃出生天。遊戲非常著重於合作及人手分配，亂玩的話應該得死路一條。

遊戲尚未公布上市日期，但係已經確定會係 2018 年尾推出。