有接觸過《Bloodborne》既朋友，相信都會對當中既設定非常讚賞，遊戲當中好大部份係受到克魯蘇神話影響的。如果大家同樣地對克魯蘇神話感興趣的話，黎緊呢隻遊戲相信一定啱你。《沉沒之城》（The Sinking City）由 Frogwares 製作，佢地之前曾經製作《福爾摩斯》系列，係製作解謎遊戲方面可謂經驗豐富。

本作同另一隻檔期非常接近既遊戲《Call of Cthulhu》（見另稿介紹），都係取材自美國著名恐怖作家 H.P. Lovecraft 作品《克魯斯的呼喚》，當然有睇過原著的話就會更加投入啦。

《沉沒之城》時間點設定係 1920年代，美國東部麻省一個架空既城市 Oakmont。呢個地方受到史無前例超自然大洪水淹沒，仲係度既人都處於瘋狂邊緣，而且仲有潛伏係暗處既神秘生物。

玩家係遊戲內扮演一位私家偵探，黎到呢個城市之後發現除咗洪水問題之外，仲有大量超自然問題需要解決，玩家必需想辦法生存落黎，同時探尋事件背後既真相。

主角個樣好似阿部寬

係宣傳片入面，大家可以見到大量極詭異既現象，包括水底巨大觸手、生滿青苔既巨大手掌、瞬間轉換場景等等。而係 E3 放出既最新片段，仲見到一名擁有念力既角色，除咗可以任意擺布主角活動之外，仲可以瞬間補滿杯中既酒，處處表現得極為怪異。

《沉沒之城》係 E3 仲有展出 Alpha Game Demo，現階段畫面表現尚可，氣氛搭救。至於戰鬥方面就感覺比較兒戲，希望之後會作出改進。美中不足既係本作最大賣點「解謎部份」就仲未見到，有啲失望。

《沉沒之城》預定 2019 年 3 月 21 日發售，暫時已知會對應日語，未知有無繁體中文。對應 PC / PlayStation 4 / Xbox One。