一講起 RPG 好多朋友立即就聯想起「升LV」、「刷寶物」等等，如果我同你講話係 Nintendo Switch 上面會出隻 RPG，有類似手機既自動戰鬥功能，同時又有星級製作團隊，故事劇情有保證，你又會唔會有興趣呢？

由 FuRyu Corporation 製作，Nintendo Switch 獨佔既《WORK × WORK》，屬於輕鬆喜劇 RPG 遊戲。遊戲製作團隊異常強勁，有經典音聲小說遊戲《恐怖驚魂夜 2》負責企劃及開發既山根敬洋；名作《半熟英雄》編劇井上信行；神作《MOTHER 3》美術今川伸浩；負責《女生轉生》系列音樂部份既増子津可燦（部份大亂鬥音樂都係出自佢手）；《Caligula》製作人山中拓也等，絕對係星光熠熠。

故事背景講述 ユイショアル王國王子「18」（エルリック），因為某個原因，令佢既皇位繼承權由第一名跌到落十八名。

為咗奪回第一名，佢同親信黎到一個叫做「勇者大人樂園」既主題樂園。這呢度充滿住大量迷宮供玩家挑戰，並且有「勇者體驗」活動進行中。不過勢估唔到，真正既魔王竟然突然出現，係呢個時候王子將會同佢係樂園相識既打工仔「ポチ夫」共同討伐魔王，進行真正既冒險。

當然叫得輕鬆喜劇 RPG，都係主打吵吵鬧鬧有笑有淚咁，係冒險過程入面，傲嬌既王子拍住平凡打工仔，譜出一段段愛歌！

《WORK × WORK》除咗故事、音樂、美術全方位屈機之外，遊戲系統將採用類似手機常見自動戰鬥系統。有自動當然有手動，遊戲將會有別於一般 RPG，採用一種叫做「教導式戰鬥（インストラクターバトル）」系統。即係只需要指指點點，比下指示、建議就得，唔需要自己上去打，相信係想令一般玩家都專注係故事內容。

《WORK × WORK》預定於 10 月 4 日發售，售價 4980 日圓。