唔理你係唔係小島監督嘅 Fans 都好，Kojima Production 喺 Sony E3 Showcase 上面發佈嘅《Death Stranding》最新影片，一定都會引起你無限懸念。遊戲以 DECIMA Engine 開發，PS4 平台獨佔，暫時仲未有正式發售日子，連「2019 Coming」都未講出口，相信如果要玩到，都仲有一段好長嘅歲月要等。

目前我就覺得《Death Stranding》似電影多過遊戲，因為劇情視點非常具有電影感。可能因為仲未有正式遊玩片段公開啦，遊戲點樣玩、系統方面嘅資訊仲係一個謎。

不過，目前公佈嘅片段當中得知，遊戲世界充滿住「肉眼睇唔到」嘅怪物，而呢啲怪物唔係用視力捕殺獵物，而係用「聽覺」，呢一個設定真係好鬼似前排上映嘅荷里活電影《無聲絕境》……條橋明明小島諗先，但人地戲都拍完上埋，遊戲幾時先玩到吖嗱？LOL

今次條 Trailer 公佈咗部份場景，Open World 設計，世界一片荒漠。

主角擔任「運送」嘅工作，經常要單拖運送唔同嘅物事翻山越嶺；世界估計係受到放射性嘅污染，因為片中見到男主角雙手接觸到雨水「Timefall」之後出現快速老化跡象。

而男主角經常若有所思地凝望住嘅照片，似乎亦係故事一大伏線之一。

至於頭先提過嘅隱型怪物，就令遊戲增加咗一份窒息嘅恐怖感；出現喺男主角身邊嘅女性角色身份，目前亦都係個謎。

我覺得玩呢個 Game 好似好易死 orz

另外 Trailer 最後出現嘅女性角色亦都相當耐人尋味。