Square Enix 今年 E3 Showcase 似乎就無咩新驚喜，大家最期待嘅《FF7 Remake》更加係提都無提（咁梗係啦，仲請緊人架嘛 LOL），不過仲係有一點令我驚艷嘅，就係佢公佈新遊戲《BABYLON’S FALL》。

遊戲對應平台為 PS4＆PC，預定 2019 年發售。《BABYLON’S FALL》係 SE 同白金工作室共同開發嘅遊戲，相信兩間公司咁快再度合作，與舊年《NieR: Automata》大賣超過 300 萬套應該不無關係。

由於仲係概念影片階段，遊戲方面資訊仲係唔多，只知道遊戲設於架空幻想世界觀，片段中以年代紀方式介紹世界嘅歷史，人類由於追求一樣名為「Oversoul」嘅事物，世界一度繁榮，但後來因為權力問題，終於開始戰鬥。戰鬥甫始，天降神罰，縱使後來女神出生，又是否能拯救世界呢？

年代紀歷史去到 CE5475年就中斷，當時講到「Nomads」出現喺 Soul 神社深部，似乎係準備覺醒嘅模樣。遊戲片後去到呢度就未有其他資訊，但係留低嘅謎團已經充以令玩家有大量幻想與期待。

無論如何，遊戲有白金工作室加持，基本上已列入我必玩名單當中，有新消息會再同大家跟進，以下係遊戲最新影片：