啱啱既 PlayStation E3 展前發布會，以《The Last of Us Part II》打頭陣，展示一條接近有十二分鐘既影片。除咗描寫百合既戲份之外（大個女了，感動），有非常長既時間係展示實機遊玩片段，當中包含硬碰硬肉搏戰、射擊戰之外，亦有展示暗殺部份，整個過程極為流暢。

小艾莉大個女了，感動

展示實機遊玩部份，暫時只見敵對人類角色，未見感染者既存在。當中展示躲藏係車底、樹叢等等動作，同時亦展示咗小艾莉展示神級防禦力，片中受到拳擊、箭傷、槍傷、大錘仔直擊，都依然步履如飛，神采飛揚。另外亦未見有聆聽模式，合成介面亦有所轉變，影片內就有示範合成「爆炸箭」。

可以趴係車底，當然敵人亦都識得烏低身搵你

新合成介面

《The Last of Us Part II》仍未公布正式上市日期，大家等下啦！