Bethesda 於今早嘅 E3 公佈今年重錘出擊之作《Fallout 76》嘅詳細資料，遊戲對應平台為 PS4、XBox One 及 PC，2018 年 11 月 14 日正式發售。同前作最大嘅分別係，《F76》將會係遊戲系列首次進行「四人線上協力」，玩家依然可以單機遊玩探索世界，不過線上連機就成了遊戲嘅新賣點。官方將會為遊戲營運獨立 Server，睇黎都對《F76》有極高期望。

遊戲嘅 Timeline 比前作稍早一些，時間為核戰爭嘅 25 年後（2102 年），遊戲地點為美國西維吉尼亞洲，玩家嘅身份係 Shelter 76 嘅居民。

遊戲為 Open World 設計，地圖約為前作 4 倍大，共分為六個區域。外國網站 Reddit 上面就有網友超好心機，將今集嘅地圖嘗試對照返現實世界嘅真實景點：

Reddit ＠TheSajuukKhar

玩家係遊戲入面會隨時遇到其他在線遊玩者，不過因為遊戲可以攻擊其他人，所以有預感呢場求生之旅絕對唔容易，如果死咗就會失去身上所有道具。除咗其他玩家造成嘅威脅，探索過程仲會遇上狂暴化嘅猛獸及其他野生動物嘅襲擊！

而上代嘅基地建設機能，今集會繼續沿用，玩家可以用組合式營地工具「C.A.M.P」於地圖任何位置設立機地。根據 Bethesda Game Studios 嘅 Todd Howard 先生形容，今次呢隻《Fallout 76》係一隻「Softcore Survival」遊戲。

但係，遊戲係咪淨係玩求生咁單調呢？其實，地圖上面仲有唔少核彈發射地點，玩家如果搵到起動密碼，就可以將呢啲核彈砲瞄準你想要嘅位置，例如係你想攻擊嘅玩家基地、或者係多猛獸嘅地方，一野給它炸個稀巴爛！絕對係好惡嘅玩法！

不過，講明先呀，話明係核彈，用完之後成個地區都會有大量核幅射，你自己嘅生活都會受到影響的喔。

同其他 Online 聯機遊戲一樣，玩家之間亦可以進行交流，仲可以玩下樂器調劑身心添 LOL

遊戲最新 Trailer 如下（用「Country Road」黎做 BGM 真係一絕！）：

另外，遊戲有分普通版同埋豪華特典版「Power Armor Edition」，內容包括遊戲中 1：1 大小嘅 Power Armor 頭盔「T-51b」、「West Tek Canvas」萬用袋、24 隻人物 Figure、螢光地圖、Tricentennial Edition 鐵盒包裝等等。

遊戲 11 月 14 日發售，各位求生者係時候搵定同伴一齊出發去射核彈！