2018 E3 即將揭幕，一連幾日嘅傳媒先行導覽將會有唔少新嘅遊戲資訊！剛剛完結嘅 EA Press Conference 入面就公佈咗《Anthem》嘅最新資訊及遊玩影片。

呢隻驟眼睇有幾分似《Destiny》嘅嘅遊戲，故事係講玩家身處嘅地方「Anthem」係一個未完成嘅世界，生活環境險惡，仲有外敵怪物入侵。為咗尋找生活下去嘅方法，人類開發咗「Javelins（標槍機甲）」希望可以扭轉生存局面。

遊戲中四種「標槍機甲」分別為「Ranger」平均型裝甲、「Colossus」重型火力裝甲、「Interceptor」輔助型裝甲，以及「Storm」速度型裝甲。

《Anthem》係一隻四人合力遊戲，玩家可以選取自己想擔當嘅機甲角色，然後進行協力任務，從而得到獎勵；玩家亦會喺遊戲當中遇上其他線上玩家。不過，官方就話遊戲目前未有 PVP 對戰嘅打算，唔知遲啲會唔會新增呢個玩法呢？

穿上機甲後，玩家可以飛上高空或潛入水底，探索靈活性極高；而玩家亦需要在任務中獲得素材去強化自己嘅駕駛能力、機甲移動性及戰鬥力。

玩家亦可以將標槍機甲以及機甲嘅配件、武器和裝備隨意個人化。玩家升 Level 或者擊破敵人，同時會得到新裝備，亦會解鎖里程碑以及各種個人化選項。所以，睇黎遊戲都係一個好大嘅坑啊～LOL

《Anthem》將於 2019 年 2 月22 日於 PS4、XBox One 以及 PC 上面同時推出，繁體中文對應。