自公佈消息以來都備受玩家關注嘅《CODE VEIN》，終於宣佈將於 2018 年 9 月 27 日發售，繁中與日文版同步上市，相信對於唔少朋友黎講，絕對係值得期待嘅好消息啊～（因為之前一直好驚佢 Delay！）

《CODE VEIN》一開始發佈時就有話過，遊戲系統係啟蒙自《Dark Souls》，而開發團隊大部份成員亦係黎自《GOD EATER》製作隊伍，目的就係想帶比玩家一個「融合兩者元素，同時帶有強烈日系遊戲色彩」嘅作品。

遊戲世界觀設定於一片荒漠嘅未來，主角係一個吸血鬼，佢覺醒之時，身處嘅都市已被「審判之棘」包圍。主角失去身為「人類」時嘅所有記憶，面對住眼前充滿危險嘅世界，佢只能夠努力嘗試努力生存落去，唔想成為「妖魔化」嘅一份子。

編輯部早前試玩過《CODE VEIN》首場 BOSS 戰，的確頗有《DS》之感，當然難度方面到正式推出嘅時候會唔會再加強、或者會唔會有得比玩家揀難度，就真係要正式開 Game 先知；不過，遊戲系統方面都複雜的，淨係武器都有片手劍、兩手劍、銃劍、斧槍及大鎚幾種！

另外遊戲中仲有一個特色武裝「吸血牙裝」，隨住打倒敵人、或者從敵人身上直接吸血，可以進行「錬血」而使用特殊大技。

遊戲中另外仲有同伴功能，可以於戰鬥中使用連攜技以及使用對方技能。

至於據點部份就比較似《Bloodborne》，主角可以在據點購買道具及武器；場景方面極靚，帶有濃厚歌德建築風格。

我由遊戲公佈一刻已經極為期待《CODE VEIN》啦！不過，遊戲推出當日剛巧都係我另一熱愛作品《閃之軌跡 4》嘅發售日，而家我真係陷於兩難，係唔係應該 Mark 定 Schedule 唔開工喺屋企閉關呢？LOL

到時可唔可以唔寫稿住呀，總編？

最後送上遊戲最新的 Trailer：