「異形(Alien)」同「血獸(Predator)」呢兩隻應對科幻迷唔會陌生啦，不過用 LEGO 砌嘅話，自己手上嘅件又未必砌得返兩隻嘅神髓，不過以上問題就難唔到台灣玩家 Cid Hsiao 。

就咁睇嘅話大家都見到兩隻都係用左唔少 Bionicle(生化戰士)同 Hero Factory(英雄工廠)兩個舊系列嘅組件，所以唔好以為就咁砌好得個擺字，組件同關節嘅穩定性亦都唔弱架。

「血獸(Predator)」

配件加埋地台，完勝一啲Action Figure大廠

其實兩年前 Cid Hsiao 己經將「血獸」完成，不過係淨係諗佢嘅頭同髮型都搞左佢好多時間。幸好嘅係 2015 年 Bionicle 再重要推出嘅時候，出過一款都同「血獸」面具有啲相似嘅組件，咁先令佢少左大部份嘅煩惱。但係大家都知「血獸」除左最標誌性嘅面具之外，另一個重點就係佢個好型嘅 Dreadlocks 頭(笑)。

淨係個髮型都搞左四、五種組件配搭，仲要就住面具嘅大細去收得埋唔好穿崩，用件嘅靈巧度可以算得上極致。

「異形(Alien)」

相對「血獸」，「異形」係更多問題需要解決，除左要搵返大量啱用嘅純黑組件，頭身比例上亦考左 Cid Hsiao 好多嘅功夫。佢講到如果要做到比較上圓嘅「異形頭」的話，可能要做到大約 2 格LEGO Size 嘅闊度，但咁樣就令到整個比例頭大身細或者仲大隻過「血獸」。所以只好將個頭嘅大細縮到大約 1.5 格，但係就要捨棄頭部嘅弧度。

不過「異形」嘅口， Cid Hsiao 佢又點去構思同用咩件呢？佢見過外國其他嘅玩家用齒輪去做「異形」嘅牙，用呢個概念聯想到用兩件類似「海軍膊頭」嘅組件，先還原到「異形」嘅重點部份。

除左 AVP 呢組作品之外，Cid Hsiao 嘅 Flickr 仲擺左好多唔同類型嘅作品比大家欣賞。除此之外，「異形」亦參加左其中一個 LEGO 網上團體 Mocer League -A LEGO online community- 嘅 Boss Challenge，如果你都有啲作品想挑戰嘅話「異形」，快啲放上去挑佢機啦！

Cid Hsiao Flickr 傳送門