文長，涉及劇透，總結在最尾，想睇評分可直接跳到最後。

仲記得當日玩Prey (2017) 既時候，睇過一篇文章討論點樣先可以做好精神續作。Prey 其實唔係之前果隻Prey 以任何型式出現既續作，反而係以前既Half-life, System Shock 甚至係Bioshock 既精神續作。

以前既遊戲總係帶比我地一種充滿回憶同埋以及幻想既美好，因為以前既我地生活好簡單，快樂好廉價，唔好話製作精美既8-bit 畫面，就連係紙上面畫天下太平都夠開心半日。到人大左，我地經常會問點解而家既遊戲永遠冇以前咁好玩？實際上，如果真係有人用以前既製作水平同技術去整一隻一樣既野，應該會收得工。因為遊戲界係呢幾十年不斷發展，無論畫面定係遊戲設計都每日進步緊。人大左，經歷多左，要求多左，快樂就自然變得越來越難求，其實遊戲一直越做越好，只係我地玩家越來越來服侍啫……….

講咁多野，我都係想講︰戰神，一個頂住咁多歷史、獎項同希望既名號，點樣可以離開自己既影子，脫離日益變得殘破既希臘神殿同埋遊戲設計，去整出一隻好玩得來，又可以令人回憶起當初既感動既遊戲呢？其實冇人真係想要返以前既戰神，所有話要返以前既戰神既人腦海中都係一隻好好玩既動作遊戲，佢地唔係遊戲設計師、唔係媒體編輯、甚至都唔係一個好上心既玩家，佢地知道而家既人要既係乜野咩？佢地知道而家既科技可以做到D 乜野咩？最後製作出來既遊戲只要對得起呢個名號，同一時間好玩，已經係最好既結果。

所有因為不知何故未玩呢一隻PS4 既戰神既人，你玩啦！你玩左，首先你會知你唔知啲乜野，呢樣先係最重要。

今次評論形式又要改變，我會同大家一齊睇下家庭、成長以及蛻變呢三個主題點樣貫穿成個遊戲。

家庭

其實應該所有人都睇得出遊戲既主旨係家庭架啦下話？唔排除仲有好多人以為今次既故事主旨係圍繞住北歐神話，但係其實遊戲入面既故事對於北歐神話可以話係Don’t give a shit!

北歐神話同希臘神話其實講來講去都係一班神，佢地自己家庭入面互相鬥爭既故事。初起Kratos 喪偶之痛，至到佢地父子要上山揚灰，Freya 問道︰既登山之路已被Odin 所攔，此揚灰之務於爾等值何價？Atreus︰Everything.

家人最後既心願又點會係用價值可以衡量，然後我地睇到Freya 對於Baldur 果種過哂份既愛子心切，甚至Magi 同Modi 果種生活係諸神家庭入面既壓力同重擔，果兩個矮人之間既鬥氣同和好，連最最細節既支線任務都係有關於弒父者既悔過，死去親人既遺骨………..

北歐神話？Who fucking care? 其實成個故事甚至於係任務設計，對白，角色，換哂唔關北歐事，成件事都work！

故事設計就係遊戲設計既一部份，背景上遊戲主要係講述緊Kratos 作為一個神話入面既人物，咁點都會同神話有啲關係，但係製作者又明白到根本北歐關我地叉事咩！呢啲虛無既人物最後都唔會同我地有任何連繫，於是非常聰明地利用神話之中既一個共同主旨︰家庭，去貫穿整個遊戲。每個人都有家庭，就算冇都會想有，呢樣野先令到角色唔再係一個虛構既人物係一個虛構既地方打一班虛構既奸角去粉碎佢地虛構既陰謀。

只要係因為家人，所有人既動機同行為都突然間變得相當明確，因為所有人都明白家人同埋想有家人係乜野既感受。呢一集God Of War 突然之間將全個系列係敍述故事上推上一個更新更高既層次！

係浮光掠影既戰鬥背後，係極致華麗既畫面之下，玩家玩完之後唯一可以帶走係心入面既，其實唯一就只有故事而已，呢個先係單機遊戲既魅力，而GOW 今次掌握得非常之好。

題外話︰點解要係家庭？

雖然話神話都係家人之間既鬥爭所以用家庭做主軸係幾方便，但係GOW 咁多年來都係用開憤怒、背叛同復仇等等既主題，一樣係神話世界，相安無事，點解今次偏偏要轉做家庭？

原來，不經不覺間，2005 年推出既God of War 1 已經過去左13 年了………假設當時既玩家係可以買得到Game 既17歲o靚仔，今年都30了。就算當年係唔知邊個幫佢買既，12 歲既小學雞，今年都已經25 了…………

係香港來講或者仲算年輕吧，其實世界好多地方，平均結婚年齡都係26-28 歲(by wiki)，即係當年玩戰神既o靚仔，今時今日真係會湊緊個o靚仔 (我網友成日一邊戰神一邊湊女都可以打到白金，邊個話有小朋友就打唔到機) 。就算未有咁好彩成家立室，都應該已經思考緊結緍同埋家庭等等既責任。對於目標客戶係大約30 歲既成熟男性來講，冇咩會比家庭更加適合，就我所現各大網媒都因為新戰神父子冒險既經歷，返照自身，再深刻了解家庭同親子既關係，真係打機都學到湊仔，善哉善哉。

成長

家庭，係成長既開始。(唔係奶粉廣告呀) 如果家庭果方面係比大人睇，咁成長呢一方面就係比細路睇。各位應該都唔會天真到以為十七禁十八禁既遊戲就真係得成年人先買到下話…….戰神作為一個系列都想吸引新支持者啦，成日都係比成年人玩咁下一隻咪要Target 40 歲以上人士？驅風油咩！

點解要加個細路落去做主角？一方面可以令到成年玩家，尤其係有小朋友果堆，覺得身同感受。另一方面就係年輕玩家第一次接觸呢一個系列既作品，對於呢個年紀有點老邁既主角不甚討喜，加入年輕主角可以令佢地搵到自己既位置，而且亦都可以淺嘗到係成長既過程中，父母係另一個角度，不聲不語地為佢做左幾多野。

戰神係自我成長既過程中算係比較幸運既一位，係奧林匹克山上果種爾虞我詐，笑裡藏刀之中，復仇左咁多年竟然都仲未痴線。但係Asgard 果班人明顯冇咁好彩，講起虛偽，如果Odin 比起Zeus 有過之而無不及。尤其係北歐人果種好戰既習性，令到果班人成日以為自己大哂，仲要故作正義。

相比之下，Atreus 係Kratos 既教導之下，雖然係軍訓，但係軍隊同學校其實除左教殺人之外，分別不大。細路既成長係必需要有一定既紀律同自制，而唔可以因為你係某人或者更仆街D，因為你父母係某人就胡作非為。

「我地竟然贏左！」

「我地贏係因為我地有充足既訓練，同埋良好既紀律，而唔係因為我地天生比人強。」

「我知，但係贏左都可以覺得開心架嘛！」

比起出世就已經係神，後天既哉培其實對一個生命既發展更為重要，或者我地本身唔係有神力既普通人。但都可以思考下係我地既人生之中有D 咩行為可以改變自己或者我地既下一代，成為更好既人。

話說回來，Baldur 本身就係一個無惡不作既壞人咩？亦都唔係，佢同Modi, Magi 一樣，都係因為父母既溺愛同縱容，最後竟然唔覺得自己有做錯事。如果只係普通人，或者佢都只係一個自大既細路，但佢地係神，所以變成左一個個滿手鮮血既怪物。

自大有一個界限，就係自己既能力。弒神無數既Kratos 就係知道世上所有野最後都有可能會輸，所有野都有上限，所以千萬唔可以自大。真正既愛就係教導孩子謙卑，自制，先會得到最後既勝利。

玩左戰神既父母同細路，你地又睇唔睇到呢個遊戲背後既意義？

蛻變

蛻變對於戰神來講有幾重意義，對於故事既敍述方法同之前既有咩分別上面講左好多。以下來睇下遊戲系統方面。

戰鬥

有好多人唔太鍾意今次既戰神直頭轉左個玩法，而且同市面上越來越多既Dark Souls 類遊戲非常相似，Fans 好驚戰神會失去左自己應有既風格，轉而變成其中一隻Dark Souls………

但係驚之前，你又有冇諗過今時今日舊戰神既玩法仲得唔得？遊戲設計就係一種咁樣既玩意，有D 野橋唔怕舊，最緊要受，好似你見橫版過關遊戲而家Indie 咪玩得幾開心？又有D 野係一舊左，真係冇人再玩架喇………AOC 夠Remaster 啦！完全好似以前咁玩，只係畫面靚左之嘛，大家都係差唔多年代既野，我唔見AOC 好似戰神咁大迴響？我唔見以前既同學個個都買隻來練返升城喎………你試下Final Fantasy 繼續整返回合制，仲有冇人買？System Shock, Deus Ex 如果再整返好似以前咁難玩同不明所以，Xcom 再整到好似以前咁唔公平，Nier 再整到好似以前DMC 咁難玩，邊到仲有新人會去試？

時代唔同左喇！況且，戰神並唔係變成左Dark Souls，Dark Souls 入面你只係一個普通人，Kratos 係一個神，如果唔係不死唔算神咁起碼佢都係超級英雄啦！遊戲入面各種既連技同特殊攻擊充滿住力量既展示，尤其係配合魔法同弓箭等等令到成個戰鬥變得極為快速同時又有策略性，呢種充滿不同攻防組合既戰鬥令我諗返起以前既DMC。敵人同物件之間既物理關係更加令人意想不到，踢敵人落崖會秒殺OK，踢敵人去令一個敵人度會一齊暈？跟住挑空敵人之後可以用飛斧直接釘上牆？WOW！你唔講我以為我玩緊Breath of the Wild，一個唔留神Kratos 就會拎舊磁石出來吸住個書櫃來fing 死隻怪架喇！

係純粹既創意呀！

Kratos 用返混沌之劍既時候攻擊模式幾乎同前作冇咩分別，係舊作既陰影之中製作團隊並冇退縮，係服待FANS 同新玩家之間得到左平衡。係舊左既基礎上佢地成功將舊武器完美呈現係新系統之中同時又令到戰鬥再有趣多百倍！你諗下你以前玩既God of War 又唔係話唔難不過最多你咪走下位，計算係攻擊距離同埋用邊種武器去最有效率殺怪啫。喂但係你睇下而家Youtube 果D？

利用地型同飛斧一下一個，利用暈技同處決取得每個敵人既特別效果，華麗連技加埋魔法睇到人目不暇給，最高難度打火之試煉同霧之試煉竟然可以完全無傷！每一下飛斧都正中要害，每一個閃避都神乎奇技，每一個防反都恰到好處！唔好話玩果個，睇果個都熱血呀！

你知唔知單機遊戲點解會越來越少人玩？但係同時Dark Souls 同Bloodborne 系列又越賣越有？因為係Twitch 同Youtube 既年代，你隻Game 好唔好賣唔係睇你質素有幾好？應該係話唔係睇你整體質素有幾好，但係你獎勵玩家創造力果方面就一定要做得好好。

而家最多人玩同睇人玩既PUBG, Fornite 同LOL 就一直都係咁。佢地只要出左隻遊戲，求其比少少力去出新野同維護好佢，整好D BUG，網上面就會突然有無數咁多人直播同出片，幫你免費永續宣傳，最後D 人落坑玩你隻Game 課金最後又咪係你賺？因為佢地就算只係得一張地圖，但你再打幾千幾萬場，都唔會有一場一模一樣既遊戲。

好多單機遊戲例如Sony 既Uncharted, The Last of Us，唔係唔好玩，畫面直頭靚到爆啦(當時來講)，又有故事性又有遊戲性，連配樂都頂呱呱！但係迴響同埋出機人數點都唔會夠BloodBorne 厲害。

點解？一句到尾好簡單，大家都係PS4 獨佔，你會情願睇人直播玩BloodBorne 定係直播玩The Last of Us 先？BloodBorne 其實每次玩每個人玩甚至因為From Software 有種19 基因，你每次死完再開始都會唔一樣！但係The Last of Us? 唔好意思，我睇住本攻略其實所有野可以執哂而且每個人玩每隻怪既位置都係一模一樣，都唔緊要但係玩法上係每個人玩都會跟一種最有效玩法，可變性唔多。

你睇人玩，梗係要睇次次都唔同既野啦！於是，單線單機越來越死，個個都走哂去整開放世界，或者好似戰神咁，變左MetroidVania 類。

你又點能夠估得到戰神可以突然改變哂單線既傳統，突然變成左一隻惡魔城咁既探索再回顧既遊戲呢？係囉，你又點能夠估得到Super Mario 會改變左單線既傳統，變左可以返之前既世界重覆挑戰呢？係囉，你又點能夠估得到薩爾達傳說會改變左單線既傳統，變左開放世界呢？係囉，你又點能夠估得到Metal Gear Solid V會改變左單線既傳統，變左開放世界呢？

遊戲設計就係咁現實。你唔蛻變，你冇得玩架喇！

呢隻遊戲既蛻變，最後最明顯展露係Kratos 既身上。可能大多數人都唔會發現，呢個遊戲真正最多戲份既唔係Kratos。Faye, Atreus 既母親，死後刻意要佢地踏上Tyr 既考驗之路。路途上充斥住Tyr 既神廟，Tyr 像，Tyr 得到過既物品，Tyr 既考驗，Tyr 經過既路，Tyr 既身世同回憶…………….

根本呢隻Game 既God of War 就唔係講緊Kratos 而係Tyr，Faye 有意係呢段路途之中希望Kratos 可以完全放棄自己之前暴戾孤獨既性格，學習Tyr 點樣係作為戰神既同時又可以為其他種族帶來和平，最緊要係，Kratos 同Tyr 唔一樣，佢唔係左膠，必要時Kratos 可以挺身而出，血洗Asgard。

你有冇見過一個故事係用成主線去側面描寫一個已經唔存在既人物？真係好少。同一時間做到係主線之中滲出背景故事同世界觀，幫手建立埋其中角色性格定位，跟手再包埋對下一集既展望，成件事同主線既動作故事完全冇違和，唔離題，唔悶唔會特登拉走你去睇，嘩，拍爛手掌！