LEGO 10261 Roller Coaster 過幾日公開發售啦，度好位未先？夠唔夠位放先？不過就算有咩問題你都會買架啦！總共由 4124 件組件砌成，長 88 cm、闊 41 cm、高 53 cm 嘅 LEGO 過山車。雖然好多玩家淨係睇相話白色圓柱件(6143)多過乜，但係 4 千件入面有包含超過 500 款組件，所以唔係大家所見咁乏味。

機械組件部份相比 10247 摩天輪嘅設計嚟得簡單，不過組裝嘅時候都要睇清楚啊。

履帶都特別做多左個支撐位，令到履帶同路軌之間嘅損耗減低。雖然過山車可以電動，但為左組件嘅狀態，大家都唔好長開 24 小時啦！(笑)

路軌上嘅一啲小裝飾，你玩過山車嘅時候又有冇留意到？過山車呢個”COASTER”招牌唔單只係可以輕易拆到落嚟，除左 S 字之外其他字母嘅擺放位置都可以改變，大家甚至可以幫個過山車改過個名添。

早前公佈都知列車有兩組，兩款藍色一深一淺，但組裝上車頭同車卡原來有啲分別！而且車頭明顯留低嘅空間比各位想加發光燈件嘅朋友改裝。
過山車登車閘口都收埋唔少得意野喺當中，除左有預備車卡嘅位置同活動閘口，簷篷仲有告示提醒乘客注意事項。

剎車位置

預備車軌，有咩突發事件就靠佢啦

小妹妹，唔夠高唔玩得架！好危險架！

你唔夠高，我係唔會開閘比你架

乘客請注意，為顧及乘客安全，過山車上不准拍攝、不准飲食，嬰幼兒及寵物亦不准乘搭，敬請留意！

LEGO 10261 Roller Coaster 總共有 11 個 Minifigures，當中有 8 個係雙表情，而且仲要喺遊樂場設施中第一次出現 LEGO 職員。

喺過山車周邊嘅設施都唔少，賣飛位加離場買紀念相嘅檔口、果汁店、綿花糖車仔檔同埋路牌，如果你之前已經有 10247 摩天輪 同 10257旋轉木馬嘅，記得擺返個路牌喺當眼地方啊，搞到大家行錯路就唔好啦 XD！

路牌旁邊仲有長櫈比大家抖抖，但係點解會有人漏底咁多野嘅？

綿花糖車仔檔嘅綿花糖，係上年年尾嘅蜂巢件(35574)加個 Minifigure 嘅頭組成。如果你覺得淨係粉紅色綿花糖太單調，咁就自己拎個蜂巢搞搞佢啦。

路軌上嘅相機就係想捕捉大家最「精彩」嘅一刻！

場景上嘅配置，亦用左唔少 2018 年嘅新組件喺當中

總結

LEGO 10261 Roller Coaster 需要嘅空間的確唔少，但無可否認佢係 LEGO 遊樂場系列作品中最好嘅作品！官方訂價港幣 $3099 亦相當合理，如果你外國計埋稅同運費可能仲貴過官方訂價，所以今次真係要比返個「讚」香港官方。

我地試玩嘅時候只係用緊 Power Function 嘅電箱同摩打兩個組件去測試運行，之前提及過長期以電動的話，好有機會令組件上有損耗。如果加入一組可改變速度嘅控制器，例如舊嘅 4548 Transformer and Speed Regulator、現役嘅 8884 IR Receiver 加 8879 IR Speed Remote Control、甚至嚟緊 8 月登場嘅 POWERED UP 系統，都可以減低損耗情況並且增加遊玩樂趣！

LEGO 10261 Roller Coaster 6 月 1 日於港、九、新界 3 間 LEGO Certified Store 獨家發售，官方訂價為港幣 $3099。

(拍攝：蕭若翹)