《Battlefield》作為戰爭射擊 Game 一哥，終於肯出皇牌啦！對上一隻二戰主題既《Battlefield 1943》已經係 2009 年既事，事隔九年終於回歸二戰主題，相信大家都好興奮！有新槍新載具呢啲廢話就唔洗講啦，最重要係有二個新既對戰模式，不過係睇新 Mode 之前，去片感受下二戰逼力先啦！

《Battlefield 5》同以往一樣由 EA DICE 製作，採用 Frostbite 引擎。另外今次相信係 EA 超重點洗底之作，因為《Battlefield 5》將不會有 Premium Pass （轉死性！），亦即係話之後主要發布後內容都會以免費形式比大家下載！（當然你可以話佢特登唔出，然後每個 DLC 賣超貴……）

有得自訂角色呢啲廢話點都要講下既……

先講講單人故事模式，將會採用同《Battlefield》同樣既「War Stories」方式表達，即係玩家會係同一個時間點，扮演戰場上唔同角色，去體驗整場戰鬥既各個面貌。綜合外媒既資訊，其中一位可供玩家扮演既角色係黎自挪威並參加抵抗納粹行動既女兵，當中仲提到法國農村、希臘、荷蘭鹿特丹同北非等等，歐洲陣線似乎係今次故事既主軸。

至於盛傳將會有既食雞「大逃殺」模式，答案係「無」，但係會有二個新既連線對戰模式。

第一個係《Battlefield》入面既「Conquest Mode」進化而成既「Grand Operations」，呢個模式係 64 人對戰，並會係四日既戰鬥。呢四日會唔同地圖及規則，並且只會有有限資源、無補給、得一條命。據稱如果二隊都平手既情況下，仲會進入突然死亡制，目標係打到最後一人「Last Stand」。

另外值得留意既係，今集大家可以重建已被破壞既建築物，例如地堡之類。而且新加入「防禦工事」要素，玩家可以消耗資源去起野，例如係特定地方裝支重機、挖條小壕溝，修復盾牌等等。所以今集玩家必須有效咁運用有限既資源，先可以有效咁取得勝利。

第二個新模式係「Combined Arms」，呢個模式會係 4人 Co-op 聯手抗敵。小隊會空降係敵方前線後方，盡可能唔比敵方發現下完成目標。而且都屬於動態任務，玩家可以選擇較安全任務，又或者深入敵陣既危險任務以獲得更大獎勵。

《Battlefield 5》將於今年 10 月 19 日正式推出，對應平台為 PS4 / Xbox One / PC。