一踏入夏天就開始多遊戲推出啦！如果你鍾意玩帶有經營元素嘅冒險遊戲，呢隻《Little Dragons Cafe（リトルドラゴンカフェ）》就啱你了～遊戲由大受歡迎嘅《牧場物語》之父「和田康宏」先生與 TOYBOX 公司聯手創作，預計 2018 年 8 月 30 日同步於 PS4 及 Switch 上發售。

遊戲背景係講主角（一對雙子兄妹）嘅母親病重，為咗令母親大人安心養病，所以就兄妹合力，決心要將阿媽間 Cafe 繼續經營、擴展、集資再上市，務求要守住阿媽嘅心血咁話。

不過，要將間餐廳搞好，就需要有好味嘅料理，亦需要同客人打好關係、建立口碑；所以，遊戲唔止有「烹調」嘅部份，亦需要你四出探險搵食物素材同埋食譜；同時，你需要養大條龍仔，等佢可以帶你飛去更遠嘅地方搵素材。

素材可以自己種

亦可以出去搵

同時要儲食譜

煮食過程有少少似小遊戲咁

好似好好食～～

咁生意要擴展，除咗靠新假期，都仲好需要靠客人嘅信任同口碑；所以，同佢地交流傾計、睇下有無嘢幫到佢地，可以話係主線嘅另一部份。

大叔好似唔開心咁

營運流程畫面

至於頭先提過條龍，亦都係遊戲中「育成」嘅部份！呢條貌似小火龍嘅龍 bb，玩家要好好餵食呀，因為佢咁先會快高長大～同埋佢真係好似寵物咁，好鬼冧豬的，唔單止會帶你周圍去，仲相當痴身，諗起都窩心 /w\

吸收蛋白質快高長大！！

長大成龍了～

我自己睇哂啲遊戲介紹就非常期待呢個 Game 啦，期待到我甚至唔係好記得故事背景係講緊「有個患病嘅阿媽」，認真不孝（笑）當然，Game 入面仲有好多農耕、釣魚、同村民建立好感度等等嘅細微設定，留返各位玩家入手遊戲時慢慢玩！

遊戲目前公佈有日文及英文版本，定價為 5,800円＋税，同時登錄 PS4 及 Switch 平台。最後為大家送上遊戲影片～