今年八月印尼雅加達巨港亞運就會正式開波，今次亞運亦係首次有電競項目參與，雖然並唔係競賽項目，而係以示範項目登場，但係都已經夠晒矚目。根據印尼電競協會公布既資訊，亞運會電競將會分為個人項目及團體項目，並且已指定六款遊戲，當中已包括電腦、家用遊戲機及手機，完全大包圍！令人意外既係大熱門 FIFA 竟然落空，取而代之既係 Winning Eleven！

六款遊戲分別為個人項目既《爐石戰記》、《星海爭霸II：虛空之遺》、《 皇室戰爭》，團體組項目為《傳說對決》、《英雄聯盟》、《Pro Evolition Soccer》（即係 Winning Eleven）。各國家及地區外圍賽將會係 5 月 5 日至 31 日期間進行，不過官方就仲未公布參賽選手資格、遊戲版本、組隊條例及規則等等。

今次奇怪之處就係無選擇最多玩家以及有國際足協認可的FIFA系列，反而揀 Winning Eleven。另外作為電競其中一大項目既格鬥遊戲就完全無影，可能原因係奧委會只會考慮「非暴力或血腥」遊戲 （所以《Rainbow Six Siege》、《CS:GO》就不被考慮）。不過其他遊戲例如、《NBA 2K》、《Dota 2》之類其實都係非常熱門既電競項目，期望之後會成為正式競賽項目。

印尼雅加達巨港亞運預計將有 45 國參加，並於 2018 年 8 月 18 日至 9 月 2 日進行。