市面上嘅手機遊戲太多，大家手頭上有邊隻遊戲係你日日都玩？定還是大部份都試玩一輪就棄 Game？今次同大家介紹呢隻由「Rayark 雷亞」開發嘅《Sdorica-萬象物語-》，由四月份開始營運以黎，我就開始玩了～玩到而家五月份，都仲係每日一有時間就拎出黎玩！

我一開始玩嘅原因， 一來係我本身係同公司作品《Deemo》嘅 Fans，所以對公司出品有信心，亦都對佢地第一隻自家嘅 RPG 充滿好奇；二來遊戲未推出嘅時候，淨係睇到人設同埋故事背景都已經很有好感……

原本我都只係抱住「試下囉！」嘅心態，無諗過，隻遊戲好玩到我今日想動筆寫文黎介紹大家落坑！

首先介紹一下故事背景，遊戲名中的「Sdorica」其實係一條龍，龍死後化成大地，龍嘅心臟變成太陽～而遊戲入面就係講太陽王國嘅故事。

劇本方面好似輕小說咁，玩家每過一章就講少少，所以我唔想劇透太多，重點梗係留返比大家玩啦！遊戲中嘅劇情，都會以動畫或者角色 Motion 黎交代，而唔係好多日系 RPG 咁淨係用人物 2D 站立繪去表達，呢一點，作為一個基本免費嘅手機遊戲大製作黎講，真係要比誠意分。

劇情交代非常有臨場感

遊戲玩法就唔係指令輸入，而係用「三色魂（白、金、黑）」去表現；每個角色嘅「一魂」「二魂」「四魂」都代表唔同技能，而唔同技能又可能要配搭另一角色嘅某啲技能黎用，先會發揮最大功效；所以遊戲難度在於：除咗要熟習角色嘅技能之外，亦都要考慮角色之間配搭、敵人嘅弱點等等，絕對唔係求其練高 Level 亂咁撳就會過到關的。

長按敵人會見到對方狀態（呢點好緊要！）

玩家亦可以喺指令盤裡面睇下唔同技能嘅作用

睇到呢度，或者你會有錯覺「咁呢個 Game 係咪要勁課金抽勁角色？」，根據我玩咗半個月嘅認知，遊戲中真係無勁唔勁角色之分，場上三個角色點樣配合先至係最緊要；而且，就算抽到一啲罕有角色，但係要將佢 Upgrade（遊戲中稱之為「共鳴」）都係需要刷素材去升的～

唔同素材可以於各關卡中獲得

夠料就可以將佢升 Rank

完成任務會送石或素材，仲會有定期活動，打得哂啲關卡仲可以解鎖新角色；所以即使係「無課金玩家」都唔會因此玩唔到呢個 Game（雖然我係有課少少金的 LOL）

如果你問我整體意見，我會答你遊戲是有難度的，關卡都唔係話過就過，不過遊戲有一個優點，就係每日限次數嘅任務，如果你 Fail 咗，佢係唔會扣你通過次數的，所以就算你想試吓越級挑戰，都唔怕少咗一個拎獎勵嘅機會。

目前我嘅進度係咁咋………

我諗我都好耐未試過咁認真地玩一隻手機遊戲（上一隻係完全唔同性質嘅《BanG Dream!》），而呢隻《Sdorica》同時對應中英日韓文，無論係偏好邊種語言嘅玩家都大丈夫！如果你同我一樣，玩手機遊戲時唔想吓吓玩 MOBA 類型遊戲，我認真推介你試吓呢隻 Game 喔！

遊戲宣傳影片：

【Sdorica 官方網站 及 Facebook】
【iOS 下載傳送門】
【Android 下載傳送門】