係呀，你無睇錯，我無計錯，如果用三次元時間計算，詩織今個月將迎來 40 歲了～（1978 年 5 月 27 日生）

雖然我明白二次元人物係無年齡之分的，生日還生日，歲數還歲數，如果條數唔係咁計，你叫金田一同埋柯南如何自處先？（駁唔到係咪？）不過，咁又好老實講，光陰似箭，1994 年首次出品嘅《心跳回憶（ときめきメモリアル》，唔理佢有無令你心跳過、唔理你當年本命係唔係詩織……呢個系列，絕對係好多朋友心目中嘅經典回憶。

《心跳回憶》之所以會成為經典，一來佢嘅玩法喺 90 年代絕對算係非常突破（雖然我係大個之後先玩返的～），二來在於多變嘅育成系統真係非常耐玩。時代轉換，近年已經少咗好多廠家做呢類型好感育想 Game 了，《心跳回憶》，無論係女性向版定係男性向版（女性向版玩家表示：葉月桂王子萬歲，聲優綠川光萬歲），KONAMI 都好似無打算再開發落去了。

……而《心跳》系列嘅最新發展，亦已經變成咁樣了。

唔好誤會喔，我對偶像育成無 Bias 的，我自己都有玩一堆偶像系手機遊戲；不過，無論係風格故事定玩法，都真係唔再係以前嗰種感覺了，詩織已經是回憶了，我地亦都唔再係少年時代了（Click 得入黎睇嘅你唔好扮十八歲啊！），不過……

當年好多好 Game 帶比我地開心嘅記憶，對此我永遠心存感激：）
最後送上遊戲當年的 OP 動畫！！

P.S. OK 詩織永遠是年輕的啦（笑）